Apple ўзининг iPhone смартфонларига банк карталаридан тўловларни контактсиз қабул қилиш имконини берадиган функция қўшишни режалаштирмоқда. Бу ҳақда ўз манбаларига таяниб, Bloomberg хабар берди.
Нашр маълумотларига кўра, компания мазкур функция устида 2020 йилдан бери иш олиб бормоқда. Айнан ўшанда Apple смартфонлардан мобил тўлов терминали сифатида фойдаланиш имконини берадиган Канаданинг Mobeewave стартапини сотиб олганди. Ушбу битим қиймати 100 миллион долларни ташкил этган.
iPhone’ни тўлов терминалига айлантириш учун Apple мавжуд техник имкониятлардан фойдаланиши керак бўлади — масалан, айни вақтда Apple Pay учун мўлжалланган NFC технологиясидан. Аммо ҳозирда iPhone’дан тўловларни қабул қилиш учун сотувчилар телефонга уланиши керак бўладиган тўлов терминалларидан фойдаланмоқда. Янги технология ёрдамида бунга зарурат туғилмайди.
Янги технология Apple Pay’нинг бир қисмига айланадими ёки компания учун алоҳида тўлов тизими сифатида ишга тушириладими — бу ҳозирча номаълум.
iOS операцион тизимини ушбу функцияга мослаб янгилаш ишлари яқин ойларда бошланиши кутилмоқда. Тез орада компания iOS 15.4 нинг бета-версиясини тақдим этиши керак.
Apple’нинг рақобатчиси бўлган Жанубий Кореянинг Samsung компанияси ҳам ўз смартфонларига шу каби функцияни қўшмоқчи. Компания смартфон орқали тўловни амалга ошириш тизимини 2019 йилда намойиш этганди.
Эслатиб ўтамиз, 2021 йилнинг июнида Apple компанияси Apple ID аккаунтларини мерос қилиб қолдиришга рухсат бергани, шунингдек, дастурлардаги махфийлик назоратини кучайтириши тўғрисида хабар берилганди. Эндиликда iCloud созламаларида фойдаланувчи вафот этган тақдирда, аккаунтини кимга қолдириб кетиши мумкинлиги борасида ишончли шахсни кўрсатиши мумкин. Шунингдек, ишончли одам фойдаланувчига Apple ID паролини унутган тақдирда, уни қайта тиклаш учун верификация коди тақдим этилади.
Изоҳ (0)