Ko‘p martalik gipertovushli planerlarni uchirishga mo‘ljallangan Amerikaning ulkan ikki fyuzelyajli Roc samolyoti o‘zining uchinchi sinov parvozini muvaffaqiyatli yakunladi. Bu haqda ixtirochi kompaniya Stratolaunch Systems’ga tayanib, “Interfaks” xabar berdi.
Qanotlari o‘lchami dunyodagi eng katta bo‘lgan samolyot Kaliforniya shtatining Moxave cho‘lida joylashgan aerodromdan havoga ko‘tarilgan. To‘rt soatdan ortiq vaqt davomida u 6,7 ming metr balandlikda turli manyovrlarni bajarib, muvaffaqiyatli qo‘nishni amalga oshirgan.
Oltita dvigatel, ikkita fyuzelyajli Stratolaunch samolyotining qanotlari 117 metrni, samolyotning o‘zining uzunligi esa 73 metrni tashkil etadi. Samolyot og‘irligi 230 tonnaga teng bo‘lib, maksimal parvoz og‘irligi — taxminan 590 tonna. Samolyot to‘liq yuklama bilan 3,7 ming kilometr masofaga parvoz qila oladi.
Mazkur samolyot yuklarni orbitaga olib chiqishga yordam beruvchi ko‘p martalik foydalanishga mo‘ljallangan Talon-A gipertovushli planerlarini uchirishga xizmat qiladigan havo platformasi sifatida sinovdan o‘tkazilyapti. Talon-A uzunligi 8,5 metrni, eni 3,4 metrni, og‘irligi esa 2,72 tonnani tashkil etadi. Missiyasini yakunlagan Talon-A oddiy uchish-qo‘nish yo‘lagiga qo‘nishni amalga oshirishi kutilmoqda.
Kompaniyaning ma’lum qilishicha, gipertovushli planerga ega samolyotning birinchi parvozi 2022-yilga rejalashtirilgan.
Umumiy og‘irligi yetti tonnaga yetadigan foydalik yuk Stratolaunch samolyotining ikkita fyuzelyaji orasiga osiladi. U 13,7 ming metr balandlikda ham parvoz qilib, raketani uchirishi mumkin, shundan so‘ng, ular o‘z dvigatellari yordamida orbitaga chiqa oladi.
Ixtirochilarning so‘zlariga ko‘ra, bu kabi usul kosmik parvozlar jarayonini sezilarli darajada arzonlashtiradi, chunki bunda raketa yonilg‘isi tejaladi.
Stratolaunch samolyotning birinchi parvozi 2019-yilning 13-aprelida, ikkinchisi 2021-yilning 29-aprelida amalga oshirilgan edi.
Izoh (0)