Қашқадарё вилоятининг Деҳқонобод туманида тажриба сифатида контейнерлардан тиббиёт масканлари ташкил этилмоқда. Бу ҳақда «Дарё»га туман ҳокимлиги ахборот хизмати хабар берди.
Қайд этилишича, туман ҳокими Зоир Алиқулов ва прокурор Лазиз Ҳамроев таклифи билан туманнинг чекка қишлоқлари, хусусан, «Усмон Юсупов» маҳалласидаги Бешқўтон қишлоғида аҳолини сифатли тиббий хизмат билан таъминлаш ва уларга қулайлик яратиш мақсадида контейнердан қулай жиҳозланган тиббиёт пункти ташкил этилган.
«Бешқўтон қишлоғи оилавий шифокорлик пунктидан олти километр узоқликда жойлашган бўлиб, 876 та хонадонда яшовчи 3892 нафар аҳоли ўз вақтида тиббий хизматдан фойдаланишда муаммоларга дуч келаётганди. Болаларни эмлаш ва тиббий кўрикдан ўтиш учун қишнинг совуқ кунларида узоқ масофани босиб ўтишга мажбур бўлаётган аҳолининг масъулларга шикояти кўпайди. Шу сабаб ҳоким ва прокурор таклифи билан контейнерлардан тиббиёт маскани ташкил этиш йўлга қўйилди», — дейди туман тиббиёт бирлашмаси бош шифокори Шавкат Амиров.
Бош шифокорнинг қўшимча қилишича, Бешқўтон қишлоғида контейнердан ташкил этилган тиббиёт масканида уч нафар патронаж ҳамшира фаолият юритишни бошлаган бўлиб, ҳафтанинг ҳар бир кунида малакали врачлар томонидан қабул ҳам ташкил этилиши йўлга қўйилган.
Ҳокимлик ахборот хизмати масъуллари келажакда туманда яна шундай 9 та тиббиёт маскани иш бошлаши режа қилинганини билдирди.
Эслатиб ўтамиз, Ўзбекистонда 2021 йилнинг 1 январь ҳолатига кўра фаолият юритаётган шифохоналар сони 1216 тани ташкил этган. Мавжуд шифохоналарнинг энг кўпи — 147 таси Тошкент шаҳрида жойлашган бўлса, энг кам шифохона Навоий вилояти ҳиссасига тўғри келади — 37 та.
Изоҳ (0)