Namanganda fan olimpiadasida g‘olib bo‘lgan o‘quvchi o‘ziga berilgan noutbukni o‘qituvchilar tortib olganini aytgan edi. Viloyat Xalq ta’limi boshqarmasi holat yuzasidan o‘tkazilgan o‘rganish ishlari natijasini ma’lum qilib, maktab direktori va o‘quvchining sinf rahbariga chora ko‘rilganini bildirdi.
22-yanvar kuni Norin tumanidagi 1-maktab o‘quvchisi Murodjon Ergashaliyev respublika miqyosida o‘tkazilgan onlayn olimpiadada matematika fani bo‘yicha faxrli 1-o‘rinni qo‘lga kiritgani munosabati bilan Xalq ta’limi vazirligi unga noutbuk sovg‘a qilgani, lekin noutbukni maktab o‘qituvchilari tortib olganini ma’lum qilib videomurojaat yo‘llagan.
Mazkur holat bo‘yicha o‘rganish o‘tkazilib, shu kunning o‘zida noutbuk Murodjon Ergashaliyevga qaytarib berilgan va shu haqida ijtimoiy tarmoqlar orqali munosabat bildirilgan.
Ta’kidlanishicha, viloyat xalq ta’limi boshqarmasi tomonidan Norin tuman xalq ta’limi bo‘limi hamda 1-sonli maktab faoliyati yuzasidan xizmat tekshiruvi o‘tkazilib, 1-sonli maktab direktori Nozimjon Xusanov, o‘quvchining sinf rahbari Sanobar Xojimurodova egallab turgan lavozimidan ozod etilgan.
Eslatib o‘tamiz, avvalroq Nurobod tumanining 41-umumta’lim maktabining 8-sinf o‘quvchisi Sardor Sattorov “Bir million o‘zbek dasturchilari” loyihasining viloyat bosqichida 1-o‘rinni olishiga qaramay, unga 3-darajali diplom hamda ishlatilgan (eski) noutbuk sovg‘a qilingan haqida xabar berilgandi. “Bu nomardlar eskini berguncha bitta kitob bilan diplom bersa bo‘lmasmidi? Changini ham artmagan buni, kim bilan necha yildan beri chang bosib yotgan. Shunchalik ham nomardlik bo‘ladimi?”, — deydi o‘quvchining bobosi.
Nurobod tumani hokimining farmoyishi bilan mazkur holatda mas’uliyatsizlikka yo‘l qo‘ygan hokim o‘rinbosariga hayfsan berildi, keyinroq ishdan bo‘shatildi. O‘quvchiga berilgan eski noutbuk yangisiga almashtirib berildi.
Izoh (0)