Toshkent shahri Yunusobod tumanida tez yordam mashinasi yo‘llar yomonligi sabab bemor bolaning oldiga bora olmagani, ikki hafta ichida bu yerga to‘rtta tez yordam mashinasi tiqilib qolgani xabar qilingandi. Tuman hokimi yordamchisi Ramziddin Muradov holat bo‘yicha “Daryo”ga ma’lumot berdi.
Qayd etilishicha, Yunusobod tumani “Bo‘zsuv” mahallasi Laylakobod ko‘chasida hozirgi kunga qadar oqava suv quvurlari mavjud bo‘lmagan. 1 oy oldin kanalizatsiya tortish jarayoni boshlangan va jarayon hozirgacha davom etmoqda.
“Ko‘cha kattaligi sabab ko‘p vaqt ketib qoldi, 2-3 kunlik ish qoldi. Yo‘l qazilganining sababi shu. Hozirda oqava quvurlar tortib bo‘lingan, asfalt qilish uchun tayyorgarlik olib borilmoqda. Qulay ob-havo sharoiti yuzaga kelishi bilan asfalt qilinadi. Hozirning o‘zida qilinsa, sifati yaxshi chiqmasligi, qazilgan joylar cho‘kib qolishi mumkin”, — deydi Ramziddin Muradov.
Eslatib o‘tamiz, holat haqida poytaxt tez yordam xizmati feldsheri Zlata Gafurova o‘zining Facebook’dagi sahifasiga yozib qoldirgandi. “Bu tez yordamni kutayotgan odamlarga mashina yuborishning imkoni yo‘q bo‘lgan vaziyat. Ikki hafta davomida u yerga to‘rtta mashina tiqilib qoldi, yordam chaqirildi. Kecha shifokor qariyb 800 metrni chamadoni va yengil kiyimda, yomg‘irda bosib o‘tdi. Tibbiyot xodimlari yechish oson bo‘ladigan yengil oyoq kiyimda yuradi, bu odatda krokslar, shippak yoki krossovkalar bo‘ladi”, — deya qayd etgan u.
Izoh (0)