Тошкент шаҳри Юнусобод туманида тез ёрдам машинаси йўллар ёмонлиги сабаб бемор боланинг олдига бора олмагани, икки ҳафта ичида бу ерга тўртта тез ёрдам машинаси тиқилиб қолгани хабар қилинганди. Туман ҳокими ёрдамчиси Рамзиддин Мурадов ҳолат бўйича «Дарё»га маълумот берди.
Қайд этилишича, Юнусобод тумани «Бўзсув» маҳалласи Лайлакобод кўчасида ҳозирги кунга қадар оқава сув қувурлари мавжуд бўлмаган. 1 ой олдин канализация тортиш жараёни бошланган ва жараён ҳозиргача давом этмоқда.
«Кўча катталиги сабаб кўп вақт кетиб қолди, 2-3 кунлик иш қолди. Йўл қазилганининг сабаби шу. Ҳозирда оқава қувурлар тортиб бўлинган, асфальт қилиш учун тайёргарлик олиб борилмоқда. Қулай об-ҳаво шароити юзага келиши билан асфальт қилинади. Ҳозирнинг ўзида қилинса, сифати яхши чиқмаслиги, қазилган жойлар чўкиб қолиши мумкин», — дейди Рамзиддин Мурадов.
Эслатиб ўтамиз, ҳолат ҳақида пойтахт тез ёрдам хизмати фелдшери Злата Гафурова ўзининг Facebook’даги саҳифасига ёзиб қолдирганди. «Бу тез ёрдамни кутаётган одамларга машина юборишнинг имкони йўқ бўлган вазият. Икки ҳафта давомида у ерга тўртта машина тиқилиб қолди, ёрдам чақирилди. Кеча шифокор қарийб 800 метрни чамадони ва енгил кийимда, ёмғирда босиб ўтди. Тиббиёт ходимлари ечиш осон бўладиган енгил оёқ кийимда юради, бу одатда крокслар, шиппак ёки кроссовкалар бўлади», — дея қайд этган у.
Изоҳ (0)