Oliy ta’lim vazirligi OTMlarda o‘qish onlayn shaklga o‘tishi haqidagi asoslanmagan xabarni tarqatmaslikka chaqirdi

Ijtimoiy tarmoqlarda O‘zbekiston oliy ta’lim muassasalarida qishki ta’tildan keyingi o‘qish onlayn shaklda bo‘lishi mumkinligi haqida xabarlar tarqaldi. Oliy ta’lim vazirligi holatga munosabat bildirdi.

Qayd etilishicha, belgilangan tartibga ko‘ra, koronavirus infeksiyasi bilan bog‘liq epidemiologik vaziyat yuzasidan Respublika maxsus komissiyasi qaror qabul qiladi hamda barcha idora va tashkilotlar, shu jumladan, oliy ta’lim muassasalari ham mazkur qaror asosida ish yuritadi. Bu borada Respublika maxsus komissiyasi qaror qabul qilgan taqdirda vazirlik rasmiy manbalari orqali qo‘shimcha ma’lum qilinadi.

“Shu sababli barcha ijtimoiy tarmoq foydalanuvchilardan asoslanmagan xabarlar tarqatmasliklarini, jamoatchilikdan esa faqat rasmiy manbalar orqali e’lon qilinadigan xabarlarga ishonishlarini so‘rab qolardik”, — deyiladi xabarda.

Eslatib o‘tamiz, O‘zbekistonda talaba va o‘quvchilar uchun qishki ta’til 25-dekabrdan boshlangan edi. Ta’til 2022-yilning 10-yanvarigacha davom etishi va dars jarayonlari 11-yanvardan boshlanishi belgilangandi. Keyinroq oliy ta’lim muassasalarining talabalari, akademik litsey va hunar maktablari o‘quvchilari uchun qishki ta’til muddati 24-yanvargacha uzaytirildi. Bunga sabab qilib rektorlar, prorektorlar, dekanlar va moliya masalalariga mas’ullar uchun o‘z kasbiy mahoratini oshirish, yangicha tartibda ishlashni boshlash maqsadida 2022-yil 10—24-yanvar kunlari amaliy seminar-treninglar tashkil etilishi ko‘rsatilgan.

Avvalroq O‘zbekistondagi maktablarda qishki ta’til 1-martgacha uzaytirilgani haqidagi xabarlar rad etilgandi.