Ироқ ва Туркияни бирлаштириб турувчи йирик Киркук—Жейҳон нефть қувурида портлаш содир бўлди, деб хабар беради Daily Sabah.
Туркия қувур линияси оператори ҳисобланувчи Ботас компаниясининг маълум қилишича, портлаш мамлакат шарқидаги Каҳрамонмараш вилояти ҳудудида жойлашган туманда содир бўлган. Кўнгилсиз ҳодиса оқибатида нефть қувурининг фаолияти тўхтатиб қўйилган, ҳодиса жойида ўт ўчирувчилар ишламоқда.
Daily Sabah’нинг таъкидлашича, портлаш сабаб ҳозирча аниқланмаган. Ҳалок бўлганлар ҳақида ҳам маълумот йўқ.
Маълумот учун, 970 километрли қувурдан Ироқнинг Киркук шаҳридан Туркиянинг Жейҳон портига нефтни етказишда фойдаланилади.
Аввалроқ Мексика кўрфазидаги денгиз қувур линиясида кучли ёнғин содир бўлгани тўғрисида хабар берилганди. Ёнғин беш соатдан кейин ўчирилган, ҳодиса жойида учта ўт ўчирувчи кема иш олиб борган. Ўшанда ёнғинга денгиз платформалари орасидаги қувур назорат клапанларидан углеводородлар оқиб чиқиши сабаб бўлгани айтилганди.
Изоҳ (0)