Qozog‘iston Milliy xavfsizlik qo‘mitasi mamlakatdagi tartibsizliklarda ishtirok etishga gumonlangan O‘zbekiston fuqarosini qo‘lga olingani to‘g‘risida xabar berdi. O‘zbekiston Tashqi ishlar vazirligi rasmiy vakili mazkur holatga munosabat bildirib, qo‘lga olingan shaxs o‘zbekistonlik emasligini ma’lum qildi.
Xabarda ta’kidlanishicha, Qozog‘istonda sodir bo‘lgan tartibsizliklarda ishtirok etishda gumon qilinayotgan O‘zbekiston fuqarosining 2022-yil 17-yanvar kuni Turkiston viloyati “Jibek joli” o‘tish punktida qo‘lga olingan.
O‘zbekistonning Olmaota shahridagi Bosh konsulxonasi tomonidan Qozog‘iston Milliy xavfsizlik qo‘mitasi matbuot xizmatidan olingan ma’lumotga ko‘ra, qo‘lga olingan shaxs O‘zbekiston fuqarosi emas.
Eslatib o‘tamiz, O‘zbekiston Tashqi ishlar vazirligi avvalroq qo‘shni Qozog‘istondagi vaziyatni muntazam ravishda kuzatib borayotganini ma’lum qilgandi. O‘zbekistonning Qozog‘istondagi diplomatik vakolatxonalari – Nur-Sultondagi elchixonasi, Olmaota va Aqtaudagi bosh konsulliklarida tezkor shtablar tashkil etilgan.
Qozog‘istondagi vaziyat 2-yanvar kuni Janao‘zen shahrida (Mang‘istov viloyatidagi shahar) suyultirilgan gaz narxining ikki baravar oshishiga qarshi mitinglar boshlanganidan so‘ng keskinlashdi. Chiqishlar iqtisodiy va siyosiy talablar bilan butun mamlakat bo‘ylab ommaviy norozilik namoyishlariga aylanib ketdi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi. Mamlakat bo‘ylab internet uzib qo‘yilgan. Mobil aloqa ham deyarli ishlamayapti. Qozog‘iston prezidenti Qosim-Jo‘mart To‘qayev mamlakatdagi ommaviy tartibsizliklar paytida halok bo‘lganlar va jarohatlanganlar borligini aytgan. Tengrinews Qozog‘iston Ichki ishlar vazirligi ma’lumotlariga tayanib, tartibsizliklar chog‘ida 8 nafar politsiyachi va Milliy gvardiya askari halok bo‘lgani, yana 317 kishi jarohatlangani haqida xabar bergan.
6-yanvarda Kollektiv Xavfsizlik Shartnomasi Tashkiloti (KXShT) tinchlikparvar kuchlari Qozog‘istonga jo‘natdi. 7-yanvarda To‘qayev Qozog‘istonda konstitutsiyaviy tartib tiklanganini e’lon qildi va mamlakat bo‘ylab terrorchilik xavfining yuqori darajasi joriy etildi. 11-yanvarda Qozog‘iston prezidenti Qosim-Jo‘mart To‘qayev parlament majlisida Kollektiv xavfsizlik shartnomasi tashkiloti (KXShT) tinchlikparvar kuchlarining Qozog‘istondagi asosiy missiyasi yakunlanganini ma’lum qilgan.
Izoh (0)