Тожикистон омикрон штамми сабаб Ўзбекистон билан чегарада назоратни кучайтирди

Тожикистонга Ўзбекистондан келаётган фуқароларнинг ПЗР-тести манфий бўлишига қарамай, назорат-ўтказиш пунктларида уларнинг томоқ ва бурунларидан коронавирусга текшириш учун суртма олинади. Бу ҳақда Сўғд вилояти санитария-эпидемиология станциясига таяниб, Asia-Plus хабар берди.

«Текширувдан сўнг, тест натижаларидан қатъи назар, ушбу фуқаролар Сўғд вилоятига кириб келганидан кейин 14 кун давомида уй карантинида бўлиши ва тиббий ниқоб тақиши шарт», — дейилади СЕС хабарида

Тожикистонга қўшни давлатларда коронавируснинг омикрон штамми  аниқланганидан кейин мамлакатнинг назорат-ўтказиш пунктлари ва аэропортларида эпидемиологик назорат кучайтирилган. Бу ҳақда Республикаси Соғлиқни сақлаш вазирлигининг Фавқулодда вазиятларда эпидемиологик хавфсизлик ва тез ёрдам бошқармаси бошлиғи Наврўз Жафаров Asia-Plus’га маълум қилди.

«Тожикистонга келганларнинг барчаси COVID-19 учун ПЗР-тестининг манфий натижасини тақдим этиши зарур, шу билан бирга ташриф буюрувчилар Тожикистон Республикасида ҳам коронавирус тестидан ўтиши керак», — деди у.

Жафаровнинг таъкидлашича, Тожикистонга Ўзбекистон ва Россиядан рейслар келмоқда. Мазкур мамлакатларда эса омикрон билан касалланиш ҳолатлари аниқланган.

«Шунинг учун, ҳозир ҳеч ким омикроннинг кириб келишидан ҳимояланмаган, коронавируснинг ушбу штамми тарқалишига йўл қўймаслик учун янада қаттиқроқ чоралар кўриш керак», — деди у.

Эслатиб ўтамиз, 7 январь куни Ўзбекистонда коронавируснинг омикрон штамми аниқланганди. Шундан буён коронавирусга чалинганлар сони орта бошлади. COVID-19 га қарши кураш бўйича Республика махсус комиссияси қарори билан 15 январдан бошлаб Ўзбекистон аэропортларида коронавирусга қарши мажбурий тест топшириш жорий этилди.

Шу билан бирга, Asia-Plus’нинг ёзишича, тожикистонликлар ноодатий симптомларга эга грипп билан касалланишни бошлаган. Республика лабораторияларда яна турнақатор навбатлар пайдо бўлган. Шифокорлар аноним равишда мамлакатда коронавирус борлигини тасдиқлаб, ҳозирда касаллик симптомлари аввалгиларидан фарқ қилаётганини таъкидламоқда. Ижтимоий тармоқлар фойдаланувчилари COVID-тестининг мусбат натижаларини кўрсатувчи фотосуратларини улашмоқда, дейилади нашр хабарида.

Тожикистон Соғлиқни сақлаш вазирлиги буларнинг барчасини мавсумий грипп билан боғлаб, мамлакатда янги штамм борлигини инкор этишда давом этмоқда. Маҳаллий лабораториялар омикрон штаммини тасдиқлай олмайди, уларда коронавируснинг турли штаммларини ўрганиш имкони йўқ, дея таъкидлаган Asia-Plus.