O‘zbekistonda chorvachilikni rivojlantirishga Fransiya bilan hamkorlikda 100 mln yevro ajratildi

“Fransiya taraqqiyot agentligi ishtirokida Chorvachilik sohasini barqaror rivojlantirishni moliyalashtirish loyihasini amalga oshirish chora-tadbirlari to‘g‘risida”gi prezident qarori imzolandi, deb xabar beradi Norma.

Unga ko‘ra, 2021-yil 28-iyunda O‘zbekiston va Fransiya taraqqiyot agentligi (FTA) o‘rtasida imzolangan bitimga asosan “Chorvachilik sohasini barqaror rivojlantirishni moliyalashtirish” loyihasini moliyalashtirish uchun 100 million yevro miqdorida qarz ajratish nazarda tutilgan. Loyihani amalga oshirish muddati — 5 yil (2022—2026-yillar).

Loyihaning umumiy qiymati 147,07 million yevro ekvivalentida bo‘lib, shundan:

• 100 million yevro — FTA’ning qarzi;
• 29,96 million yevro — Loyiha ishtirokchilari (benefitsiarlar)ning ulushi;
• 17,1 million yevro (shu jumladan soliq va bojxona to‘lovlari shaklida mablag‘lar) — O‘zbekistonning ulushi.

Bojxona kodeksiga asosan O‘zbekistonning xalqaro shartnomalari bo‘yicha xalqaro moliya institutlari va xorijiy hukumat moliya tashkilotlari tomonidan berilgan qarzlar (kreditlar) hisobidan yuridik shaxslar tomonidan bojxona hududiga olib kiriladigan tovarlar bojxona bojidan ozod qilingan.

Belgilanishicha:

• Loyihani amalga oshirish doirasida FTA qarzi hisobidan xarid qilinadigan tovarlarni (ish, xizmatlarni) va maxsus transport vositalarini olib kirishda (sotib olishda) QQS tovarlarni (ish, xizmatlarni) olib kiruvchilar (import qiluvchilar, xizmatlarni sotib oluvchilar) tomonidan to‘lanadi;
• ushbu bojxona boji imtiyozlari natijasida bo‘shagan mablag‘lar hamda tovarlarni olib keluvchilar tomonidan to‘langan qo‘shilgan qiymat solig‘i summasi O‘zbekistonning loyihani amalga oshirishdagi ulushi deb hisoblanadi.

Loyiha dastlab Qoraqalpog‘istonda, Toshkent, Jizzax, Sirdaryo, Qashqadaryo, Samarqand va Buxoro viloyatlarida amalga oshiriladi. Loyiha doirasida nazarda tutilgan chora-tadbirlar 50 foizdan ziyod moliyalashtirilgandan so‘ng, respublikaning barcha viloyatlarida amalga oshiriladi.

Veterinariya va chorvachilikni rivojlantirish davlat qo‘mitasi loyihaning o‘z vaqtida va to‘liq amalga oshirilishi, uning muvofiqlashtirilishi va boshqarilishi, shuningdek, loyihani amalga oshirish davrida monitoring va hisobot yuritilishi uchun mas’ul ijro etuvchi organ hisoblanadi.

Qarz bitimi doirasida yuzaga kelgan barcha to‘lovlar loyihada ishtirok etuvchi banklar bilan qayta kreditlash bitimlari imzolangunga qadar davlat budjeti hisobidan qoplab beriladi va qayta kreditlash bitimlari imzolanganidan so‘ng Loyihada ishtirok etuvchi tijorat banklari tomonidan ularga ajratilgan mablag‘lar miqdoriga mutanosib ravishda O‘zbekistonning respublika byudjetiga qaytariladi.

Hujjat bilan quyidagilar tasdiqlangan:

• “Chorvachilik sohasini barqaror rivojlantirishni moliyalashtirish” loyihasining asosiy texnik-iqtisodiy ko‘rsatkichlari;
• loyiha doirasida Fransiya taraqqiyot agentligining qarzini so‘ndirish, foiz va komissiya to‘lovlarini amalga oshirishning prognoz jadvali;
• “Chorvachilik sohasini barqaror rivojlantirishni moliyalashtirish” loyihasini amalga oshirish bo‘yicha “yo‘l xaritasi”.

Hujjat qonun hujjatlari ma’lumotlari milliy bazasida e’lon qilingan va 2022-yil 14-yanvardan kuchga kirgan.

Eslatib o‘tamiz, Qozog‘istonning Tashqi savdo siyosati va xalqaro iqtisodiy tashkilotlarda ishtirok etish masalalari bo‘yicha Idoralararo komissiyasining qaroriga muvofiq, 2021-yil 15-dekabrdan 6 oy muddatga tirik qoramol eksportiga taqiq joriy qilingandi. Shu munosabat bilan O‘zbekiston Veterinariya va chorvachilikni rivojlantirish davlat qo‘mitasi faoliyati chorva hayvonlarini import qilish bilan bog‘liq bo‘lgan xo‘jalik yurituvchi subyektlarga turli iqtisodiy muammolar va kutilmagan zararlar oldini olish maqsadida tavsiyalar e’lon qilgan edi.