2021-yilning avgustida Navoiyda uka akasini ketmon bilan urib, o‘ldirib qo‘ygani to‘g‘risida xabar berilgandi. Jinoyat ishlari bo‘yicha Xatirchi tuman sudi ayblanuvchi ukaga nisbatan sud hukmi o‘qildi, deb xabar beradi O‘zA.
Ma’lum qilinishicha, 2021-yilning 7-dekabr kuni jinoyat ishlari bo‘yicha Xatirchi tuman sudi binosida o‘tkazilgan ochiq sud majlisida o‘z akasining o‘limiga sababchi bo‘lgan Sh.O.ga (1990-yilda tug‘ilgan) nisbatan jinoyat ishi ko‘rib chiqilgan.
Sh.O. 2021-yil 4-avgust kuni Navoiy shahri “Yoshlik” mahalla fuqarolar yig‘ini hududida “Shohjahon Shamshiri” mas’uliyati cheklangan jamiyati tomonidan olib borilayotgan qurilish obyektining 3-qavatida akasi E.O. bilan birga ovqatlangan. Aka-uka spirtli ichimlik iste’mol qilgan. Mast holatda ish haqi masalasida akasi E.O. bilan o‘rtalarida o‘zaro kelishmovchilik kelib chiqqan. Janjal avjiga chiqib, Sh.O akasining bosh qismiga shu yerda turgan ketmon dastasi bilan bir marotaba urib, unga tan jarohati yetkazgan.
E.O. Respublika shoshilinch tez yordam ilmiy markazi Navoiy viloyati filialiga yotqizilib, ko‘rsatilgan tibbiy muolajalarga qaramasdan 9-avgust kuni kasalxonaning jonlantirish bo‘limida vafot etgan.
Sud-tibbiy ekspertiza ilmiy-amaliy markazi Navoiy filialining 2021-yil 17-avgustdagi 137-sonli xulosasida marhum E.O.ning tanasida hayot uchun xavfli bo‘lgan og‘ir tan jarohatlari mavjudligi va bu jarohatlar uning o‘limi sababi bilan bevosita bog‘liq ekanligi ko‘rsatilgan.
Sud Sh.O.ni sodir etgan jinoyatining xususiyati va ijtimoiy xavflilik darajasi, muqaddam sudlanmagani, aybiga to‘liq iqrorligi, qonuniy vakilning da’vosi yo‘qligi, qilmishidan chin ko‘ngildan pushaymonligi, oilaviy sharoitini inobatga olib, Jinoyat kodeksi 104-moddasi (qasddan badanga og‘ir shikast yetkazish) 3-qismi “d” bandi Jinoyat kodeksining 57-moddasini (yengilroq jazo tayinlash) qo‘llab, 5 yilga ozodlikdan mahrum qilish jazosi tayinlangan.
Avvalroq Qashqadaryoda aka-uka qarzini bermagan tanishini pichoqlab o‘ldirgani, Andijonda onasiga baqirgan ukasi bilan janjallashib, uning o‘limiga sababchi bo‘lgan aka 10 yilga qamalgani to‘g‘risida xabar berilgandi.
Izoh (0)