Urganch xalqaro aeroporti noqulay ob-havo sharoiti tufayli yopildi, deb xabar bermoqda Uzbekistan Airports.
Qayd etilishicha, kechqurunga borib kuchaygan qor Urganchdagi xalqaro aeroportning yopilishiga sabab bo‘lgan. Dastlabki ma’lumotlarga ko‘ra, aeroport 19-yanvar kuni ertalab soat 05:00 gacha yopiq bo‘ladi.
Urganch aeroporti hozirda yopiq. Qor yog‘ishi kuchaygani sababli uchish-qo‘nish yo‘lagining ishqalanish koeffitsiyenti 0,3 ni tashkil etmoqda, bu esa samolyotlarning uchishi va qo‘nishiga imkon bermaydi. Ob-havo ma’lumotlariga ko‘ra, tun bo‘yi qor yog‘adi. Shu munosabat bilan yana ikkita reys kechiktirilishi kutilmoqda. Qozon—Urganch yo‘nalishi bo‘yicha “Ural havo yo‘llari” aviakompaniyasining samolyoti belgilangan aeroportga soat 21:45 da qo‘nishi kerak edi, biroq mezbon tomonning ob-havo sharoiti tufayli haligacha samolyot Qozondan uchmagan. Red Wings aviakompaniyasining Moskva—Urganch reysi bilan ham vaziyat xuddi shunday. Ushbu reys samolyoti ham “Domodedovo” aeroportidan havoga ko‘tarilmagan.
Avvalroq 18-yanvar kuni noqulay ob-havo sharoiti (qor yog‘ishi) tufayli Istanbul—Urganch yo‘nalishi bo‘yicha uchgan HY–280 reysi bo‘yicha samolyoti Toshkentga yo‘naltirilgani xabar qilingandi. Samolyot aeroportga bortida 98 nafar yo‘lovchisi bilan soat 19:29 da favqulodda qo‘ngan. Aviakompaniya barcha yo‘lovchilarni 19-yanvar kuni ertalabgacha mehmonxonaga joylashtirishga qaror qilgan. Dastlabki ma’lumotlarga ko‘ra, samolyot HY–051 reysi bilan soat 07:15 da Toshkentdan Urganchga uchadi.
Dastlabki ma’lumotlarga ko‘ra, har ikkala reys ham 19-yanvar ertalabgacha qoldirilgan. Aviakompaniyaning aniq jo‘nab ketish vaqti keyinroq ma’lum qilinadi.
Izoh (0)