Farg‘ona shahridagi uylarning birida 14-yanvar kuni uch kishi is gazidan zaharlanib, vafot etgani, ulardan biri xonadon mehmoni bo‘lgani ma’lum qilingandi. Bosh prokuror matbuot kotibi Hayot Shamsutdinov holat bo‘yicha qo‘shimcha ma’lumot berdi.
Qayd etilishicha, 14-yanvar kuni soat 13:00 larda shaharning “Istiqlol” mahallasida yashovchi ikki kishi hamda shu xonadonga mehmonga kelgan bir nafar fuqaro Respublika shoshilinch tez tibbiy yordam ilmiy markazi Farg‘ona filialiga olib borilgan. Tez tibbiy yordam ko‘rsatilganiga qaramasdan, ular shifoxonada vafot etgan.
Vafot etganlarning ikki nafari harbiy xizmatchi ekani aniqlangan.
Hozirda holat yuzasidan Farg‘ona harbiy prokuraturasi tomonidan tergovga qadar tekshiruv harakatlari o‘tkazilmoqda.
Avvalroq Namangandagi xonadonda gaz portlashi oqibatida er-xotin va ularning 3 nafar farzandi kuyib, tan jarohati olgani, Oqqo‘rg‘onda avgust oyida oila qurgan er-xotin is gazidan zaharlanib, vafot etgani, Farg‘onada ota va bola is gazidan zaharlanib, vafot etgani to‘g‘risida xabar berilgandi.
Izoh (0)