Toshkent shahrining Yashnobod tumanida otasiga qo‘l ko‘tarib, uning ko‘zlarini qontalash qilgan 31 yoshli o‘g‘ilga sud hukmi o‘qildi. Bu haqda “Sevimli” telekanalining “Zamon” informatsion dasturida ma’lum qilindi.
Ta’kidlanishicha, ota-o‘g‘il o‘rtasida bundan oldin ham bir necha bor janjal sodir bo‘lgan. Xususan, bir safar o‘g‘il oshxona pichog‘i bilan otasiga tashlangan.
“Bizni uyda oddiy gaplashib bo‘lmaydi. Albatta, baland ohangda gapirilishi kerak, shu narsalarni ko‘rib katta bo‘lganmiz. Otam ham dadasini urgan, oddiy narsa bo‘lib qolgan bu. Kim qanaqa tushunadi, bilmadim-u, bu narsa menga oddiy hol bo‘lib qolgan”, — deydi o‘g‘il.
Ota-o‘g‘ilning so‘nggi janjalidan keyin uy egasining ahvoli yomonlashgan. Shu kuni tez yordam xizmati otaga birinchi yordamni ko‘rsatgan va o‘g‘il kasalmand otasini o‘zi urganini tan olgan. Holat bo‘yicha IIBga xabar berilgan.
Jinoyat ishlari bo‘yicha Yashnobod tuman sudining ochiq sud majlisida Jinoyat kodeksining 104 va 105-moddalari bo‘yicha ayblanuvchining ishi ko‘rib chiqilgan. Otasiga qo‘l ko‘targan o‘g‘il Jinoyat kodeksining 105-moddasi 1-qismi bilan aybdor deb topilgan va 2 yil-u 6 oy muddatga ozodlikdan mahrum etilgan. Jazoni o‘tash uchun manzil koloniyalarga yuborish belgilangan.
Avvalroq Buxoroda mast ota o‘ziga tanbeh bergan 18 yoshli o‘g‘lini pichoqlab o‘ldirgani, Toshkent viloyatida o‘g‘lini bolta bilan urib o‘ldirgan 70 yoshli otaga sud hukmi o‘qilgani to‘g‘risida xabar berilgandi.
Izoh (0)