O‘zbekistonda “Qarovsiz hayvonlar bilan ishlashni tubdan takomillashtirish chora-tadbirlari to‘g‘risida”gi prezident qarori loyihasi ishlab chiqilmoqda. Bu haqda Telegram’dagi “Ekologuz” kanali xabar berdi.
Ma’lumotlarga ko‘ra, qaror bilan Qoraqalpog‘iston Vazirlar Kengashi, viloyatlar va Toshkent shahar hokimliklarining hududlarni Obodonlashtirish boshqarmasiga qarashli qarovsiz hayvonlarni ovlash brigadalarini tugatish rejalashtirilgan. Ularning funksiya va vakolatlari Veterinariya qo‘mitasiga o‘tkaziladi.
Veterinariya qo‘mitasi quyidagilar bilan shug‘ullanadi:
- qarovsiz hayvonlar populyatsiyasining o‘sishini nazorat qilish;
- har bir hududda hayvonlar boshpanalarini tashkil etish;
- zotdor hayvonlarni sertifikatlash;
- statistikani yuritish.
Shu bilan birga, evtanaziya tartibi faqat kasal, agressiv quturgan hayvonlarga nisbatan qo‘llanilishi belgilangan.
Bundan tashqari qaror loyihasida mushuklarga nisbatan ularni emlash (chiplash), sterillash qo‘llanilib, ularni yana kemiruvchilar ko‘paymasligi uchun qaytib qo‘yib yuborish nazarda tutilgan. Chiplangan hayvonlar va ularning egalari bo‘yicha elektron bazani yaratish ham qaror loyihasida mavjud.
Eslatib o‘tamiz, 2021-yilning aprelida “Mehr va oqibat” hayvonlarni himoya qilish jamiyati viloyatlar veterinarlarini Toshkentdagi xususiy klinikalarda boshpanasiz it va mushuklarni sterilizatsiya hamda kastratsiya qilish (bichish) bo‘yicha o‘qitish loyihasini ishga tushirgandi.
Izoh (0)