Тошкент шаҳрининг Яшнобод туманида отасига қўл кўтариб, унинг кўзларини қонталаш қилган 31 ёшли ўғилга суд ҳукми ўқилди. Бу ҳақда «Севимли» телеканалининг «Замон» информацион дастурида маълум қилинди.
Таъкидланишича, ота-ўғил ўртасида бундан олдин ҳам бир неча бор жанжал содир бўлган. Хусусан, бир сафар ўғил ошхона пичоғи билан отасига ташланган.
«Бизни уйда оддий гаплашиб бўлмайди. Албатта, баланд оҳангда гапирилиши керак, шу нарсаларни кўриб катта бўлганмиз. Отам ҳам дадасини урган, оддий нарса бўлиб қолган бу. Ким қанақа тушунади, билмадим-у, бу нарса менга оддий ҳол бўлиб қолган», — дейди ўғил.
Ота-ўғилнинг сўнгги жанжалидан кейин уй эгасининг аҳволи ёмонлашган. Шу куни тез ёрдам хизмати отага биринчи ёрдамни кўрсатган ва ўғил касалманд отасини ўзи урганини тан олган. Ҳолат бўйича ИИБга хабар берилган.
Жиноят ишлари бўйича Яшнобод туман судининг очиқ суд мажлисида Жиноят кодексининг 104 ва 105-моддалари бўйича айбланувчининг иши кўриб чиқилган. Отасига қўл кўтарган ўғил Жиноят кодексининг 105-моддаси 1-қисми билан айбдор деб топилган ва 2 йил-у 6 ой муддатга озодликдан маҳрум этилган. Жазони ўташ учун манзил колонияларга юбориш белгиланган.
Аввалроқ Бухорода маст ота ўзига танбеҳ берган 18 ёшли ўғлини пичоқлаб ўлдиргани, Тошкент вилоятида ўғлини болта билан уриб ўлдирган 70 ёшли отага суд ҳукми ўқилгани тўғрисида хабар берилганди.
Изоҳ (0)