Uzbekistan Airways aviakompaniyasining samolyoti Minsk milliy aeroportida uchish-qo‘nish yo‘lagidan chiqib ketdi. Bu haqda aeroport matbuot xizmati xabar berdi.
Toshkent—Minsk yo‘nalishi bo‘yicha parvozni amalga oshirgan Airbus A-320 samolyoti kuchli qor va bo‘ron oqibatida Minsk milliy aeroportiga muvaffaqqiyatli qo‘nishni amalga oshirgan, biroq boshqaruv vaqtida uchish-qo‘nish yo‘lagidan chiqib ketgan.
Havo kemasi bortida 115 nafar yo‘lovchi bo‘lgan. Dastlabki ma’lumotlarga ko‘ra, jabrlanganlar yo‘q. Ko‘ngilsiz hodisa oqibatida samolyotga shikast yetmagan.
Ta’kidlanishicha, hozirda voqea joyida avariya-qutqaruv xizmatlari ish olib bormoqda.
Telegram’dagi “MotolkoPomogi” kanali ma’lumotlariga ko‘ra, Uzbekistan Airways samolyoti bilan sodir bo‘lgan voqea sabab “Belavia” aviakompaniyasining Sankt-Peterburg—Minsk yo‘nalishi bo‘yicha uchgan reysi Lepel shahri bo‘ylab aylanmoqda. Shuningdek, Moskva—Minsk bo‘yicha uchgan B2958 reysi ham aynan shu sabab aeroportga qo‘na olmayapti.
Ikkala reys ham Sankt-Peterbugga yo‘l olgan. Favqulodda holat sabab Lukashenkoning Boeing 767-300 samolyoti ham qo‘nishni amalga oshira olmay, Brest tomonga uchgan.
Izoh (0)