Ramzan Qodirov 3 kunlik muhlat ichida ingush xalqidan unga qarshi birorta ayblov qo‘yilmaganini ma’lum qildi

Ingushetiya aholisiga unga qarshi ayblovlar qo‘yish uchun uch kun muhlat bergan Checheniston rahbari Ramzan Qodirovga nisbatan hech qanday shikoyat kelib tushmadi. Bu haqda Qodirov Instagram’dagi jonli efirda ma’lum qildi.

“Bugun uch kun o‘tdi, hech kim qon adovatini e’lon qilmadi, hech kim xalq oqsoqollariga, Checheniston muftiylariga murojaat bilan chiqmadi, buning uchun Yaratganga shukrlar aytaman. Bu bizning birodar ekanimizdan dalolat beradi. Bizda, shaxsan men —Ramzan Qodirovda Ingushetiya bilan bog‘liq hech bir muammo yo‘qligini e’lon qilmoqchiman”, — deydi Checheniston rahbari qisman rus, qisman chechen tilidagi chiqishida.

“Ramzan Ingushetiya va ingush xalqining dushmani emas. Biz birodarmiz va shunday bo‘lib qolamiz... Demak, huquq himoyachilari nomi ostidagi poraxo‘r shoqollar, siz xalqlarimizni parchalab tashlay olmaysizlar”, — deya qo‘shimcha qilgan Qodirov.

Checheniston milliy siyosat, tashqi aloqalar, matbuot va axborot vaziri Axmed Dudayevning aytishicha, Qodirov Ingushetiya haqidagi barcha salbiy bayonotlarni ijtimoiy tarmoqlardan uchirib tashlashga chaqirgan. “Hissiyotlar ta’sirida yoki boshqa sabablarga ko‘ra internetda ingush xalqi yoki ularning biror vakili haqida salbiy bayonot e’lon qilgan har bir kishidan uni o‘chirib tashlashni so‘raymiz”, — dedi Dudayev.

12-yanvar kuni Ramzan Qodirov Ingushetiya aholisiga unga nisbatan asosli ayblovlar qo‘yish uchun uch kun muhlat bergandi. Bu Ingushetiya sobiq amaldorining Qodirovni quchoqlab salomlashgani uchun xalqidan kechirim so‘ragani sabab kelib chiqqan mojaro fonida yuz berdi.

“Ingush xalqidan iltimos. Agar men dushmaningiz bo‘lsam, aybim va jazo darajasini belgilab oling. Nima qilmoqchi ekaningizni ayting: urish, quvish, o‘ldirish. Nimada aybdor ekanimni Rossiyaning davlat yoki shariat qonunlari bo‘yicha asoslang va mening xalqimga, oqsoqollarimga murojaat qiling hamda rasmiy jazoni bildiring, barcha an’analarimizga rioya qiling”, — degan Qodirov o‘z murojaatida.

Shundan so‘ng ingushlarning “Mexk-Kxel” jamoat tashkiloti hamraisi Sarajdin Sultigov YouTube’da Qodirovga o‘z da’volarini bildirgan videosini e’lon qildi. U Checheniston va Ingushetiya o‘rtasidagi chegaralarni aniqlash bo‘yicha ikki tomonlama komissiya tuzishni, chechen rasmiylaridan esa qo‘shni respublika aholisini xafa qilmaslikni so‘radi.

Checheniston va Ingushetiya o‘rtasidagi chegara hududlari uchun mojaro SSSR parchalanganidan keyin boshlangan, chunki respublikalar o‘rtasidagi chegara aniq belgilanmasdan, ular yagona Chechen-Ingush ASSR tarkibida edi.