15-yanvardan boshlab O‘zbekiston aeroportlarida koronavirusga qarshi majburiy test topshirish joriy etilgandi. Ushbu tartib ortidan yo‘lovchilarga ayrim muammolarni keltirib chiqardi.
Xususan, Toshkent xalqaro aeroportida virus tarqalishi xavfini oshirgan holda test olish uchun turnaqator navbatlar yuzaga kelgani aks etgan videolar tarqaldi. “Podrobno.uz”ning yozishicha, bunga test sinovlari o‘tkaziladigan punktlar hamda valyuta ayirboshlash shoxobchalari yetarli emasligi sabab bo‘lgan.
Test sinovidan o‘tish qiymati Markaziy bank kursi bo‘yicha so‘m ekvivalentida 5 dollar miqdorida belgilangandi. Mamlakatga kelgan aksariyat yo‘lovchilarda so‘m bo‘lmagani uchun ular dastlab valyutani so‘mga ayirboshlash uchun, so‘ng ekspress-testdan o‘tish uchun boshqa navbatda turishlariga to‘g‘ri kelmoqda.
Shu bilan birga, ko‘pchilik rasmiylarning bunday qaror (majburiy test joriy etilishi — tahr.) qabul qilganining o‘zi g‘azablangan. Chunki barcha kelgan yo‘lovchilar salbiy PZR testiga ega va nima uchun ular yana ekspress-testdan o‘tishlar kerakligini tushunmagan. Ayrimlar esa test narxi 5 dollar etib belgilanganini qimmat va ortiqcha xarajat deb hisoblamoqda.
Sanitariya-epidemiologik osoyishtalik va jamoat salomatligi xizmati munosabati
Holatga munosabat bildirgan Sanitariya-epidemiologik osoyishtalik va jamoat salomatligi xizmatining qayd etishicha, PZR test topshirgan insonlarda ham virus aniqlanmoqda.
15-yanvar kuni Toshkent shahriga uchib kelgan 3 801 nafar fuqarodan ham test sinamalari olingan. Ularning barchasida manfiy PZR testi bo‘lganligiga qaramasdan 67 nafarida musbat natija aniqlangan. Yurtimizdagi barcha chegara punktlari orqali shu kuni 15 041 nafar fuqaro o‘tgan. Ulardan 151 nafarida koronavirusda musbat natija aniqlangan.
“Qo‘lida kasallikdan forig‘ligi haqida ma’lumoti bo‘lgan fuqarolarning ‘nega yana qayta ekspress test topshirishim kerak?’ deb o‘ylashlari tabiiy. Lekin ko‘rib turganingizdek, PZR test topshirgan insonlarda ham virus aniqlanmoqda. Bu esa kasallik yanada ‘ayyorlashib’, yashirin ko‘rinishga kirib borayotganidan dalolat. Bunday holatda yurtimizga kirib keluvchi har bir fuqaroni koronavirusga ekspress-antigen test topshirtirib qabul qilish eng to‘g‘ri yo‘ldir”, — deyiladi SSV tomonidan e’lon qilingan munosabatda.
Qayd etilishicha, 5 dollar ekvivalentida belgilangan ekspress test narxi dunyo ko‘rsatkichlariga nisbatan eng arzon narxlardandir. Shuningdek, test topshirish jarayonida talabalik guvohnomasini taqdim etgan talabalarga 50 foiz chegirma beriladi. I va II guruh nogironligi bor shaxslar uchun testlar bepul. Ikki yoshgacha bo‘lgan bolalardan test olinmaydi. Bu tadbirlardan maqsad aholining salomatligini saqlash ishlarini samarali tashkil etishdir.
Vaqtincha joriy etilgan bu tartib koronavirus infeksiyasini yuqtirgan fuqarolarni tezkor aniqlash, davolash va infeksiya tarqalishining oldini olishga xizmat qiladi.
“Shuning uchun yurtdoshlarimizdan mazkur chora-tadbirlarni to‘g‘ri qabul qilib, o‘z fuqarolik burchini anglab, mamlakatimiz hududida koronavirus pandemiyasining yangi to‘lqini ko‘tarilmasligi uchun shaxsan hissa qo‘shishlarini so‘rab qolamiz”, — deyiladi Sanitariya-epidemiologik osoyishtalik va jamoat salomatligi xizmati munosabatida.
Izoh (0)