Андижонда МИБ ходимини пичоқ билан жароҳатлаган фуқаро қамоққа олинди

Андижонда МИБ ходимини ҳақорат қилиб, уни пичоқ билан жароҳатлаган фуқаро қамоққа олинди, деб хабар бермоқда «Дарё» мухбири.

МИБ Андижон вилоят бошқармаси ахборот хизматининг маълум қилишича, Жиноят ишлари бўйича Асака тумани судининг 15 январдаги ажримига мувофиқ Жиноят кодексининг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан гумон қилувчи Асака туманида яшовчи фуқаро С.Ж.га нисбатан қамоққа олиш эҳтиёт чораси қўлланилган.

Эслатиб ўтамиз, Андижонда фуқаро МИБ ходимини пичоқ билан жароҳатлагани ҳақида 13 январь куни хабар берилган эди.

Фуқаролик ишлари бўйича Асака туманлараро судининг 2021 йил 21 октябрдаги ижро варақасига кўра, қарздор А.Ж. томонидан Асака тумани Нажмиддин Кубро кўчасида жойлашган автошоҳбекатнинг йўловчилар учун мўлжалланган кутиш қисмида ўзбошимчалик билан қуриб олинган савдо дўкони қурилмаси ўзининг ҳисобидан мажбурий тартибда буздирилиши белгиланган.

2022 йилнинг 11 январида ноқонуний қурилмани бузиш учун ваколатли идоралар вакиллари иштирокида мажбурий ижро ҳаракатлари ўтказилган. Ижро ҳаракатлари давомида қарздорнинг ўғли С.Ж. дўконда бўлган ошхона пичоғи билан тарафларни қўрқитиб, давлат ижрочиси Х.Меҳмоновга тан жароҳати етказган. Натижада мажбурий ижро ҳаракатлари бошқа кунга қолдирилган.

Қайд этиш лозим, Жиноят кодексининг 219-моддасида назарда тутилган жиноятларни содир этган шахслар БҲМнинг 50 бараваридан 100 бараваригача миқдорда жарима ёки 360 соатгача мажбурий жамоат ишлари ёхуд 3 йилгача ахлоқ тузатиш ишлари ёки 1 йилдан 3 йилгача озодликни чеклаш ёки 1 йилдан 3 йилгача озодликдан маҳрум қилиш билан жазоланади.