Erling Holandning qaysi klubga o‘tmoqchi ekanligi ma’lum bo‘ldi

“Borussiya D” hujumchisi Erling Holand kelajagiga borasidagi savollarga oydinlik kiritdi.

Hozirda Holandga bir qator grand klublar qiziqish bildirmoqda. Xususan, Angliyaning “Manchester Siti” klubi norvegiyalik futbolchini o‘z safiga qo‘shib olmoqchi. Bosh murabbiy Pep Gvardiola uni jamoani tark etgan Ferran Torresning o‘rnini to‘ldira oladigan yagona nomzod sifatida ko‘rmoqda. “Shaharliklar” tarkibida ayni vaqtda faqatgina bitta hujumchi — Gabriel Jezus qolgan.

Holandning o‘zi esa “Real”da o‘ynashni xohlamoqda, deb xabar beradi AS. 21 yoshli futbolchi agenti Mino Rayolaga hozirda “PSJ”da to‘p surayotgan Kilian Mbappe bilan birga “qaymoqranglilar” safida o‘ynashni xohlayotganini aytgan.

Holand Rayoladan tezroq “Real” bilan kelishuvga erishishni so‘ragan. Chunki “Borussiya D” futbolchini kelajagi borasida tezroq qaror chiqarishga undagan. Bu haqida Holand “Frayburg”ga qarshi o‘yindan so‘ng (5:1) aytib o‘tdi:

“Borussiya D” keyingi mavsum uchun hozir qaror chiqarishim kerakligini aytib, menga bosim o‘tkazmoqda. Men shunchaki futbol o‘ynashni xohlayman. Ehtimol, tez orada chora ko‘rishim kerakligini anglatar. Avvalroq bu haqida umuman gapirmaganman, chunki klubni hurmat qilaman.

Erling Holand, “Borussiya D” hujumchisi

Erling — birdaniga qaror chiqaradigan odam. Unga ruxsat berilgan, u bilan hech qanday muammo yo‘q. Albatta, klubning vaziyatga qarashi borasida o‘z tasavvuriga ega bo‘lishga haqqi bor. Uning jamoadagi kelajagiga oydinlik kiritishini may oyining so‘ngiga qadar kuta olmaymiz.

Hans Yoahim Vatske, “Borussiya D” direktorlar kengashi raisi