Эрлинг Ҳоланднинг қайси клубга ўтмоқчи эканлиги маълум бўлди

«Боруссия Д» ҳужумчиси Эрлинг Ҳоланд келажагига борасидаги саволларга ойдинлик киритди.

Ҳозирда Ҳоландга бир қатор гранд клублар қизиқиш билдирмоқда. Хусусан, Англиянинг «Манчестер Сити» клуби норвегиялик футболчини ўз сафига қўшиб олмоқчи. Бош мураббий Пеп Гвардиола уни жамоани тарк этган Ферран Торреснинг ўрнини тўлдира оладиган ягона номзод сифатида кўрмоқда. «Шаҳарликлар» таркибида айни вақтда фақатгина битта ҳужумчи — Габриэль Жезус қолган.

Ҳоланднинг ўзи эса «Реал»да ўйнашни хоҳламоқда, деб хабар беради AS. 21 ёшли футболчи агенти Мино Райолага ҳозирда «ПСЖ»да тўп сураётган Килиан Мбаппе билан бирга «қаймоқранглилар» сафида ўйнашни хоҳлаётганини айтган.

Ҳоланд Райоладан тезроқ «Реал» билан келишувга эришишни сўраган. Чунки «Боруссия Д» футболчини келажаги борасида тезроқ қарор чиқаришга ундаган. Бу ҳақида Ҳоланд «Фрайбург»га қарши ўйиндан сўнг (5:1) айтиб ўтди:

«Боруссия Д» кейинги мавсум учун ҳозир қарор чиқаришим кераклигини айтиб, менга босим ўтказмоқда. Мен шунчаки футбол ўйнашни хоҳлайман. Эҳтимол, тез орада чора кўришим кераклигини англатар. Аввалроқ бу ҳақида умуман гапирмаганман, чунки клубни ҳурмат қиламан.

Эрлинг Ҳоланд, «Боруссия Д» ҳужумчиси

Эрлинг — бирданига қарор чиқарадиган одам. Унга рухсат берилган, у билан ҳеч қандай муаммо йўқ. Албатта, клубнинг вазиятга қараши борасида ўз тасаввурига эга бўлишга ҳаққи бор. Унинг жамоадаги келажагига ойдинлик киритишини май ойининг сўнгига қадар кута олмаймиз.

Ҳанс Ёаҳим Вацке, «Боруссия Д» директорлар кенгаши раиси