Shavkat Mirziyoyev 13-yanvar kuni Rossiya prezidenti Vladimir Putin bilan telefon orqali muloqot qildi. Bu haqda Prezident matbuot xizmati xabar qildi.
Qayd etilishicha, suhbatda davlat rahbarlari O‘zbekiston—Rossiya strategik sheriklik va ittifoqchilik munosabatlarining joriy holati va istiqbollarini muhokama qilgan. Oliy darajada o‘tgan uchrashuvda erishilgan kelishuvlar muvaffaqiyatli amalga oshirilayotgani ta’kidlangan.
Turli darajalardagi delegatsiyalarning o‘zaro tashriflari faollashgan. 2021-yil yakunlariga ko‘ra tovar ayirboshlash hajmi 33 foizga oshgan.
Tomonlar O‘zbekiston va Rossiya o‘rtasida diplomatik munosabatlar o‘rnatilganining 30 yilligiga bag‘ishlangan turkum tadbirlar o‘tkazish muhim ekanini qayd etgan.
Shuningdek, Qozog‘istonda ro‘y bergan voqealar nuqtayi nazaridan Markaziy Osiyodagi vaziyat yuzasidan ham fikr almashilgan. Qozog‘iston rahbariyati tomonidan ushbu mamlakatda tinchlik va osoyishtalikni tiklash, vaziyatni barqarorlashtirish borasida ko‘rilayotgan chora-tadbirlar qo‘llab-quvvatlangan.
Eslatib o‘tamiz, Shavkat Mirziyoyev Qozog‘istondagi vaziyat bo‘yicha Qosim-Jo‘mart To‘qayev (1, 2) va Emomali Rahmon, Rajab Toyyib Erdo‘g‘on bilan telefon orqali muloqot qilib, holatni muhokama qilgandi.
Izoh (0)