Ijtimoiy tarmoqlarda “Yangi O‘zbekiston” bog‘idagi “Istiqlol” stellasi barelyefiga zarar yetgani, yo‘laklarda yoriqlar paydo bo‘lgani va boshqa kamchiliklar aks etgan suratlar tarqalgandi. Holatga Qurilish vazirligi munosabat bildirdi.
Unda aytilishicha, vazirlik matbuot xizmati xodimlari “Yangi O‘zbekiston bog‘i”da bo‘lib, mavjud holatni o‘rgandi. Barelyef muallifi, haykaltarosh Shohrux O‘rozovning vazirlikka bildirishicha, barelyef haykalining hozirgi ko‘rinishi vaqtincha gipsdan tayyorlangan va stellaning yuzasiga moslab ishlangan haykaltaroshlik ishi sanaladi.
Shu kunlarda ijodiy ishlarni badiiy darajasi yuqori bo‘lishi uchun uni bronzaga ko‘chirish ishlari olib borilmoqda. Uning ma’lum qilishicha, barcha haykaltaroshlik namunalari odatda dastlab gipsdan tayyorlanadi. So‘ng ma’lum sinov muddati o‘tgach, bronza yoki toshlarga ko‘chiriladi.
Hozirda stella majmuasiga ishlangan barelyefning bronza ko‘rinishi deyarli 80 foiz tayyor holatga keltirilgan va tez kunlarda stella majmuasiga olib kelib o‘rnatiladi.
“Aslida haykaltaroshlik texnologiyasi birinchi eskiz tayyorlanadi, keyin ichki model, undan keyin gips variantda model yaratiladi. So‘ng qolip olib qattiq materiallarga — bronza, mis yoki toshlarga ko‘chiriladi.
Ijtimoiy tarmoqlarda ishlar sifatsiz qilingan deyilmoqda. Aslida sifatsiz emas, gips variantda turibdi. Yomg‘ir, qor ta’sirida ustidagi bo‘yoqlari ko‘chgan, lekin gisp varianti turibdi. Hozirda bronzaga ko‘chirish jarayoni jadallik bilan ketmoqda. Uni olib kelib o‘rnatilganidan keyin gips olib tashlanadi va bronza variantida unday yomon ko‘rinish yuz bermaydi”, — degan Shohrux O‘rozov.
Tarmoqda tarqalgan suratlarda bog‘dagi trotuarlarga ham zarar yetgani ko‘rsatilgandi. “Yangi O‘zbekiston” bog‘i ma’muriyati vakili Mirjalil Mirqosimov buni bayramlar vaqtida yo‘lovchilar oqimi katta bo‘lgani bilan izohlagan.
Eslatib o‘tamiz, Toshkent viloyatining poytaxtga tutash qismida Qibray tumanida joylashgan “Yangi O‘zbekiston” bog‘i 2021-yil 31-avgust kuni ochilgan. Prezident Shavkat Mirziyoyev bog‘ va monumentning tantanali ochilish marosimida ishtirok etib, nutq so‘zlagandi.
2021-yilning noyabrida ushbu bog‘dagi Mustaqillik monumenti Turkiyadan olib kelingan materiallardan qayta rekonstruksiya qilinayotgani to‘g‘risida xabarlar tarqalgandi. Holatga rekonstruksiya ishlarini olib borayotgan Turkiyaning Outdoor Factory Acik Hava Fabrikas shirkati mutaxassisi Sinan Turaman izoh bergan.
Unda ushbu monument loyihasini qisqa muddatlarda barpo qilish vazifasi yuklatilgani, ammo Turkiyada koronavirus pandemiyasi sababli belgilangan karantin cheklovlari natijasida zarur mutaxassis va xomashyo mahsulotlarini o‘z vaqtida O‘zbekistonga olib kelish imkoniyati bo‘lmagani, natijada monumentning muhim bo‘lgan tarixiy shaxslar, davlat arboblari va hodisalarni aks etuvchi detallari to‘liq o‘rnatilmagani bildirilgan. COVID-19 pandemiyasi bilan bog‘liq cheklovlar yumshatilgandan keyin bu ishlarni amalga oshirish imkoniyati paydo bo‘lgan.
Ma’lumot uchun, “Yangi O‘zbekiston” bog‘i va “Istiqlol” majmuasi qurilishining pudratchisi, davlat xaridlari portali ma’lumotlariga ko‘ra, Mimar Group hisoblanadi. Qurilish-montaj ishlari qiymati, davlat xaridlari portalidagi ikkita lotga muvofiq, mos ravishda 146,5 milliard va 47,8 milliard so‘mga baholangan.
Izoh (0)