3-yanvar kuni Energetika vazirligi shtabi tomonidan o‘tkazilgan tadbir davomida Jizzax viloyatining Sharof Rashidov tumani “Xayrobod” MFY hududida yashovchi fuqaro Q.B.ga tegishli xonadonda tabiiy gazdan noqonuniy foydalangan holda ohak ishlab chiqarayotgani ma’lum bo‘ldi. Bu haqda Energetika vazirligi matbuot xizmati xabar berdi.
Ushbu holatda dastlabki hisob-kitoblarga ko‘ra 22 ming 809 kub metr tabiiy gazdan noqonuniy foydalanilgani aniqlangan. Mazkur hajmdagi tabiiy gaz o‘rtacha 1 500 ta xonadonning bir kunlik iste’molini tashkil qiladi.
Shuningdek, 5-yanvar kuni o‘tkazilgan tadbirda Sharof Rashidov tumani “Xayrobod” MFY hududida yashovchi fuqaro Q.M.ga tegishli xonadonda ham tabiiy gazdan noqonuniy foydalanilgani ma’lum bo‘lgan. Bunda fuqaro 57 ming kub metr tabiiy gazdan noqonuniy ravishda foydalangani aniqlangan.
Mazkur hajmdagi tabiiy gaz o‘rtacha 3 000 ta xonadonning bir kunlik iste’molini tashkil qiladi.
Bundan tashqari, o‘tgan oyda o‘tkazilgan tadbirda Jizzax shahri “Suloqli” MFY, Toshkent ko‘chasida faoliyat yuritayotgan “Maftuna sharafjon” MChJga qarashli ohak ishlab chiqarish sexida ham tabiiy gazdan noqonuniy foydalanish holati aniqlangan.
Unda mazkur MChJ tomonidan 2 dona aylanma ohak pechi o‘rnatgan holda dastlabki hisob-kitoblarga ko‘ra, 205 ming kub metr tabiiy gazdan noqonuniy foydalanilgan va gaz ta’minoti korxonasiga 205 million so‘m zarar yetkazilgan. Mazkur hajmdagi tabiiy gaz o‘rtacha 12 000 ta xonadonning bir kunlik iste’molini tashkil qiladi.
Yuqorida qayd etilgan noqonuniy holatlar bo‘yicha rasmiylashtirilgan hujjatlar chora ko‘rish uchun huquqni muhofaza qilish organlariga topshirilgan.
Avvalroq Samarqand viloyatidagi gaz zapravka 5,4 milliard so‘mlik gaz o‘g‘irlagani aniqlangani, Navoiyda ohak ishlab chiqarish korxonasi gazdan noqonuniy foydalanib, 295 million so‘m zarar yetkazgani to‘g‘risida xabar berilgandi.
Izoh (0)