Ko‘chmas mulk sohasidagi magnat, millioner Robert Dyorst vafot etdi, deya xabar bergan The New York Times. Dyorst sog‘lig‘i yomonlashgani tufayli Kaliforniya shtatidagi qamoqxonadan shifoxonaga o‘tkazilgandi. Shifoxonada mahbusning yuragi urishdan to‘xtagan, reanimatsiya muolajalari natija bermagan.
2021-yil oktabr oyida AQSh sudi uni 21 yil avval yaqin tanishi Syuzan Bermanni o‘ldirganlikda aybdor deb topgan va umrbod qamoq jazosiga hukm qilgandi.
Sud maslahatchilari 78 yoshli Dyorstni 2021-yil sentabr oyida mazkur jinoyatni sodir etgan deb hisoblagan. Kaliforniya shtatidagi qonunchilikka muvofiq vahshiyona qotillikda aybdor deb topilganlar o‘limga yoki umrbod qamoq jazosiga hukm qilinadi. Los-Anjeles prokuraturasi Dyorstni qatl qilishni talab qilmadi, sababi shtatda o‘lim jazosini ijro etishga moratoriy e’lon qilingan.
Dyorst uchta qotillikka aloqador. 1982-yilda uning rafiqasi Ketlin bedarak yo‘qolgan va keyinchalik ayol o‘lgan deb topilgan. Sud maslahatchilari millionerni Berman qotilligida aybdor deb topgan, ma’lumotlarga ko‘ra qotilning o‘zi tergovga rafiqasini qanday o‘ldirgani haqida gapirib bergan. 2001-yilda Dyorst qo‘shnisi Morris Blekni o‘ldirganlikda gumon qilinib, hibsga olingan. Dyorst qotillikni sodir etganini va marhumning tanasini bo‘laklab, dengizga tashlab murdadan qutulganini tan olgan. Shunga qaramay millionerning advokatlari Dyorstning o‘zini o‘zi himoya qilganini isbotlab, yakunda u oqlangandi.
Dyorst dugonasini o‘ldirgani haqida HBO kompaniyasining “Tavqila’nat: Robert Dyorstning hayoti va o‘limi” nomli hujjatli filmni suratga olish vaqtida bexosdan gapirib yuborgan.
“Mana, shunaqa gaplar. Seni ushlashdi, keyin nima qilding? Barchani o‘ldirding”, — degan u suratga olish maydonchasidan yuvinish xonasiga kirganida o‘ziga o‘zi, biroq millioner u vaqtda mikrofonni o‘chirib qo‘yishni unutgan.
Dyorst 2015-yil mart oyida hibsga olingan. Ayol esa millionerning rafiqasi Ketlinning bedarak yo‘qolishi bo‘yicha politsiya tomonidan so‘roq qilinishi kerak bo‘lgan kuni o‘z uyida otib ketilgan holda topilgan.
Prokuratura Dyorst Bermanni peshanasidan otib qo‘ygan deb hisoblagan. Ayblov versiyasiga ko‘ra u rafiqasini o‘ldirgani, keyinchalik jinoyat izlarini yashirish uchun Bermanni ham otishga majbur bo‘lganini tan olgan. Millioner uzoq vaqt davomida jinoyatlarga aloqadorligini inkor etgan, ammo tergov vaqtida buning aksi bo‘lgan gaplarni gapirgan.
2021-yil noyabrdagi sud hukmidan keyin Dyorst rafiqasi Ketlinni o‘ldirganlikda ham ayblandi
“Biz Keti Dyorst ishi bo‘yicha uning oilasi va butun dunyodagi zo‘ravonlik qurbonlari uchun adolatli hukm chiqarishda katta qadam tashladik”, — degan o‘sha vaqtda okrug prokurori bo‘lgan Miriam Roka.
Robert Dyorst — Nyu-Yorkda ko‘chmas mulk sotuvchi katta savdogarning o‘g‘li. Forbes jurnalining 2020-yildagi reytingida Dyorst oilasi butun dunyodagi boy oilalar ro‘yxatida 47-o‘rinda qayd etilgan. Oila ko‘chmas mulk savdosidagi eng katta sulolalardan biri hisoblanadi va umumiy boyligi 8,1 milliard dollarga baholangan.
Izoh (0)