Yaponiya hukumati koronavirusning “omikron” shtammi tufayli doimiy rezident bo‘lmagan xorijliklarning mamlakatga kirishiga qo‘yilgan taqiqni fevral oxirigacha uzaytiradi. Bu haqda Yaponiya bosh vaziri Fumio Kisidaga tayanib, “Interfaks” xabar berdi.
“Omikron’ bilan bog‘liq bu yerdagi va xorijdagi vaziyat bir-birdan farq qiladi, shuning uchun chegara nazorati bo‘yicha amaldagi shartlar fevral oyi oxirigacha saqlanib qoladi”, — degan Yaponiya vaziri.
Aksariyat toifaga mansub xorijiy fuqarolarning mamlakatga kirishini taqiqlash 2021-yilning 30-noyabrida Yaponiyada “omikron” shtammi bilan kasallanishning ilk holatlari tasdiqlanganidan so‘ng joriy qilingan va dastlab bir oyga rejalashtirilgan edi.
Chet elda bo‘lib qaytgan Yaponiya fuqarolari va mamlakatda doimiy rezident bo‘lgan xorijliklar hukumat tomonidan maxsus ajratilgan joylarda karantindan o‘tishi shart etib belgilangan. Yaponiyaga kiritiladiganlarning kunlik soni 3,5 ming kishi bilan cheklangan.
Avvalroq Tailand chet ellik sayyohlar uchun deyarli barcha turistik manzillarini yopgani, Xitoyda koronavirus tufayli yana bir shahar lokdaunga yopilgani haqida xabar berilgandi.
Niderlandiya hukumati “omikron” shtammi tarqalishi tufayli Yevropa Ittifoqi mamlakatlari orasida birinchi bo‘lib lokdaun joriy qilgandi. Shuningdek, Germaniya “omikron” shtammi tufayli britaniyaliklarning mamlakatga kirishini cheklagan.
Eslatib o‘tamiz, Isroil “omikron” shtammining tarqalishini oldini olish maqsadida dunyoda birinchi bo‘lib chet el fuqarolari uchun 2 haftaga o‘z chegaralarini yopib qo‘ygandi.
Izoh (0)