Turkmaniston Vazirlar Mahkamasining 7-yanvar kuni o‘tkazilgan yig‘ilishida prezident Gurbanguli Berdimuhamedov 2022-yilda bir qator yirik obyektlar foydalanishga topshirilishini eslatib o‘tdi, deb xabar beradi “Xronika Turkmenistana”.
“Ular orasida biz uchun muhim bo‘lgan Axal viloyatining ma’muriy markazi ham bor bo‘lib, u yerdagi ishlar yakuniy bosqichda amalga oshirilmoqda”, — degan Berdimuhamedov.
Vazirlar Mahkamasining 2021-yil 17-dekabrdagi yig‘ilishida Turkmanistonda hozirda ishlab chiqarish hamda ijtimoiy maqsadlarga mo‘ljallangan 2,5 mingdan ortiq yirik bino va inshootlar qurilayotgani ma’lum qilingan. Ularning umumiy qiymati 37 milliard dollarni tashkil etadi. Ashxobod va viloyatlar hokimlari, vazirliklar hamda Sanoatchilar va tadbirkorlar ittifoqi bilan hamkorlikdagi idoralar tomonidan o‘tkazilgan tahlillar natijalariga ko‘ra, 2022-yilda ochilishi rejalashtirilgan obyektlar ro‘yxati tuzilgan.
Prezident rejalashtirilgan ishlarni o‘z vaqtida va sifatli bajarish bo‘yicha yuzaga keladigan masalalarni tezkor ko‘rib chiqib, hal etish bo‘yicha har hafta yig‘ilish o‘tkazishni topshirgan.
Tegishli komissiya rahbari etib Axal viloyatiga mas’ul bo‘lgan bosh vazir o‘rinbosari Chori Gilijov tayinlangan, uning a’zolari — amalga oshirilayotgan ishlarning moliyaviy qismiga mas’ul bosh vazir o‘rinbosari Serdar Berdimuhamedov va qurilish ishlariga mas’ul bosh vazir o‘rinbosari Chorimirat Purchekov.
Prezident Berdimuhamedov yuzaga kelgan masalani hal etish uchun komissiya a’zolari istalgan rahbarni taklif etishi mumkinligini, o‘zi esa imkon doirasida bir nechta yig‘ilishda qatnashini ta’kidlagan.
Turkmaniston prezidenti oxirgi marta yangi shaharning qurilishi bilan 2021-yilning 21-oktabr kuni tanishgandi. Davlat rahbariga o‘shanda shaharda qurilishi rejalashtirilgan Bolalarni sog‘lomlashtirish-reabilitatsiya markazi, o‘lkashunoslik muzeyi, sirk va boshqa yangi inshootlar loyihalari ko‘rsatilgan. Prezident, shuningdek, tom qoplamalari, avtobus bekatlari, chiroqlar, ichki devor qoplamalari, tomoshabinlar o‘rindiqlari, gilamlar va derazalardagi oynalarning rangini tasdiqlagan edi.
Ma’lumot uchun, Axal viloyati Turkmaniston poytaxti — Ashxobod o‘zining boshqaruv organlari bilan alohida ma’muriy birlik bo‘lib ajralib chiqqach paydo bo‘lgan.
Izoh (0)