AQShda koronavirus aniqlangan, biroq uning yengil shaklini boshdan o‘tkazayotgan tibbiyot xodimlariga professional majburiyatlarini bajarishga ruxsat berildi, deb xabar beradi Associated Press.
Ta’kidlanishicha, hukumat bu kabi qarorni mamlakat shifoxonalariga tibbiyot xodimlari yetishmayotgani va “omikron” shtammi sabab yangi kasallanish holatlari ortayotgani bois qabul qilgan.
O‘tgan dam olish kunlari Kaliforniya shtati sog‘liqni saqlash organlari koronavirusga topshirgan testi ijobiy chiqqan, biroq yengil kechayotgan shifoxona xodimlarining ishlashiga ruxsat bergan. Rod-Aylend va Arizonadagi ayrim kasalxonalar, shuningdek, xodimlariga kasallik belgilari borligiga qaramay, ishda qolishi mumkinligini ma’lum qilgan.
“Omikron” shtammi AQShda koronavirus bilan kasallanish holatlarining ortishiga olib keldi, xususan, o‘rtacha bir kunda 700 ming kishida COVID-19 tasdiqlanmoqda — bu bir yilda o‘rnatilgan antirekorddan ko‘pdir.
Mamlakatdagi ko‘plab kasalxonalar nafaqat kasallar bilan to‘lib toshgan, balki koronavirusga chalingan kasal ishchilarning ko‘pligi sababli ularning ishlarida yetarli cheklovlar mavjud.
Reuters agentligining ma’lumotlariga ko‘ra, AQShda 10-yanvar kuni 1,35 million kishida koronavirus infeksiyasi tasdiqlangan. Bu butun dunyoda pandemiya boshlanganidan buyon qayd etilgan sutkalik eng yuqori ko‘rsatkich. Bundan oldingi rekord 3-yavar kuni qayd etilgandi — o‘shanda AQShda bir sutkada 1,03 million kishida COVID-19 aniqlangan.
Shuningdek, AQShda koronavirus bilan shifoxonaga yotqizilgan bemorlar soni ham pandemiya boshlanganidan buyon maksimal ko‘rsatkichga chiqqan. Ma’lum qilinishicha, o‘tgan 24 soat ichida 136 mingdan ortiq odam shifoxonaga yotqizilgan.
Koronavirus bilan kasallanish holatlarining ortishi qator hududlarda xodimlar, o‘qituvchi va maktab avtobuslari haydovchilari yetishmovchiligini keltirib chiqarib, maktablar faoliyatini to‘xtatmoqda. Nyu-Yorkda xodimlar orasida kasallar soni ortgani bois uchta metro liniyasining ishi to‘xtatilgan.
Avvalroq Kiprda delta va “omikron” shtammlarining gibridi aniqlangani, Buyuk Britaniya va Fransiyada koronavirus bilan kunlik kasallanish rekordlari yangilangani to‘g‘risida xabar berilgandi.
Izoh (0)