Futzal bo‘yicha O‘zbekiston milliy terma jamoasi Futsalplanet Awards talqiniga ko‘ra 2021-yilning eng yaxshi jamoasi nomiga da’vogarlar ro‘yxatidan o‘rin oldi, deb xabar bermoqda O‘FA matbuot xizmati.
Qayd etilishicha, futzal olamida nufuzli hisoblangan Futsalplanet.com sayti tomonidan muntazam ravishda yilning eng yaxshilari aniqlab kelinadi. Bu galgi Futsalplanet Awards marosimi oldidan e’lon qilingan nominatsiyalardan O‘zbekiston vakillari ham o‘rin olgan.
Xususan, dunyoning eng yaxshi futzal jamoasi nomiga da’vogarlarning kuchli o‘nligida O‘zbekiston milliy terma jamoasi qayd etilgan. O‘zbekistondan tashqari, ushbu ro‘yxatdan Argentina, Bosniya va Gersogovina, Eron, Yaponiya, Qozog‘iston, Marokash, Portugaliya, Slovakiya va Venesuela terma jamoalari joy olgan.
Yilning eng yaxshi terma jamoa murabbiyi nominatsiyasida esa O‘zbekiston terma jamoasi bosh murabbiyi Bahodir Ahmedov kuchli o‘ntalikdan joy oldi.
Eslatib o‘tamiz, O‘zbekiston 2021-yili Litvada bo‘lib o‘tgan Jahon chempionatida A guruhida ikkinchi o‘rinni egallab, pley-offga yo‘l olgandi. Nimchorak finalda Bahodir Ahmedov jamoasi 8:9 hisobida Eronga imkoniyatni boy berib qo‘ygan edi.
Izoh (0)