Футзал бўйича Ўзбекистон миллий терма жамоаси Futsalplanet Awards талқинига кўра 2021 йилнинг энг яхши жамоаси номига даъвогарлар рўйхатидан ўрин олди, деб хабар бермоқда ЎФА матбуот хизмати.
Қайд этилишича, футзал оламида нуфузли ҳисобланган Futsalplanet.com сайти томонидан мунтазам равишда йилнинг энг яхшилари аниқлаб келинади. Бу галги Futsalplanet Awards маросими олдидан эълон қилинган номинациялардан Ўзбекистон вакиллари ҳам ўрин олган.
Хусусан, дунёнинг энг яхши футзал жамоаси номига даъвогарларнинг кучли ўнлигида Ўзбекистон миллий терма жамоаси қайд этилган. Ўзбекистондан ташқари, ушбу рўйхатдан Аргентина, Босния ва Герцоговина, Эрон, Япония, Қозоғистон, Марокаш, Португалия, Словакия ва Венесуэла терма жамоалари жой олган.
Йилнинг энг яхши терма жамоа мураббийи номинациясида эса Ўзбекистон терма жамоаси бош мураббийи Баҳодир Аҳмедов кучли ўнталикдан жой олди.
Эслатиб ўтамиз, Ўзбекистон 2021 йили Литвада бўлиб ўтган Жаҳон чемпионатида А гуруҳида иккинчи ўринни эгаллаб, плей-оффга йўл олганди. Нимчорак финалда Баҳодир Аҳмедов жамоаси 8:9 ҳисобида Эронга имкониятни бой бериб қўйган эди.
Изоҳ (0)