“U ilk daqiqadayoq xatoga yo‘l qo‘ydi”. Joze Mourinyo “Yuventus”ga qarshi o‘yindan keyin Eldor Shomurodovni tanqid qildi

“Roma” bosh murabbiyi Joze Mourinyo A Seriya 21-turi doirasida “Yuventus”ga qarshi o‘yindan so‘ng o‘z fikrini bildirib o‘tdi.

Biz 70 daqiqa davomida o‘yinni nazorat qildik. Jamoa juda yaxshi o‘ynadi, o‘yinni nazorat qilish uchun xarakter ko‘rsata oldi.

Ammo 70-daqiqadan keyin psixologik sinish boshlandi. Feliks Afena-Gyan ajoyib o‘yin o‘tkazdi, ammo uning o‘rniga maydonga tushgan futbolchida (Eldor Shomurodov) hammasi noto‘g‘ri ketdi. U ilk daqiqadayoq xato qildi.

Kuchli xarakterga ega raqibga hisobni 2:3 qilishiga imkon bermasligimiz kerak edi. Qo‘rquv, psixologik komplekslar paydo bo‘la boshladi. Bunday hisob men uchun muammo emas, ammo jamoa uchun muammoga aylandi. Mag‘lub bo‘layotgan paytda oyoqqa tura olish va xarakter ko‘rsatish muhim. Ammo bizning kiyinish xonamizda juda bo‘sh va ojiz o‘yinchilar bor.

Futbolchilarimga agar o‘yin 70-daqiqada yakuniga yetganida bu uchrashuv ajoyib bo‘lardi, deb aytdim. Afsuski, unday bo‘lmadi.

Joze Mourinyo, “Roma” bosh murabbiyi

“Roma” o‘z uyida “Yuventus” bilan bahs olib bordi va 3:4 hisobida mag‘lubiyatga uchradi. Uchrashuvning 71-daqiqasida Eldor Shomurodov Feliksning o‘rniga maydonga tushdi. “Yuventus”ning uchinchi goli vaqtida Shomurodov havodagi kurashda yengildi va natijada Makkenni jarima maydoniga osonlik bilan kirib bordi.