“Barselona” 12-yanvar kuni Ispaniya Superkubogi yarim finalida “Real”ga qarshi o‘ynaydi.
Kataloniyaliklar uchrashuvga qadar Ferran Torresni ro‘yxatdan o‘tkazishiga umid qilmoqda. “Ko‘k-anorranglilar” direktori Mateu Alemani bosh murabbiy Xaviga yaqin 48 soat ichida yarim himoyachini ro‘yxatdan o‘tkazish va uning Madrid jamoasiga qarshi bahsda qaydnomaga kirishi uchun qo‘lidan kelgan barcha ishni qilishga va’da berdi.
Hozircha buning uchun Filippe Koutinyoning “Aston Villa”ga ketishi yetarli bo‘lmadi, endi kataloniyaliklar Serxi Roberto bilan maoshini pasaytirish borasida muzokaralar olib bormoqda. Robertoning “Barselona” bilan shartnomasi 2022-yilning iyunida yakuniga yetadi va futbolchi jamoada qolish istagida. Hozirda klub u bilan maoshi pasaytirilgan holda yangi shartnoma imzolanishiga umid qilmoqda.
Shu tariqa agar Torresning koronavirusga topshirgan testi manfiy chiqsa va klub uni ro‘yxatdan o‘tkaza olsa, futbolchi jamoa bilan birga Saudiya Arabistoniga uchib ketadi.
Shuningdek, klub rahbariyati Robertodan tashqari boshqa futbolchilar bilan ham shunday yo‘l tutmoqchi. Jamoa Samyuel Umtiti va Yusuf Demirga xaridor izlamoqda. 18 yoshli avstriyalik futbolchi “Barselona” safida yana bitta o‘yinda maydonga tushsa, “Rapid”ga 10 million yevro to‘lab berish lozim bo‘ladi.
Izoh (0)