Ўзбекистонда май ойидан буён халқаро имтиҳонларда юқори балл олган ёшларнинг имтиҳон харажатларини компенсация қилиш учун 5,2 миллиард сўм сарфланган. Бу ҳақда Ёшлар ишлари агентлиги Алишер Садуллаев хабар қилди.
Маълум қилинишича, 2021 йил 1 майдан бошлаб 5 та турдаги халқаро имтиҳон тизимларида юқори натижа қайд этган (IELTS – 7 ва ундан юқори; TOEFL – 95 ва ундан юқори; GMAT – 75 фоиз ва ундан юқори; GRE – 75 фоиз ва ундан юқори; SAT – 1200 ва ундан юқори) натижани қайд этган ёшларнинг имтиҳон харажатлари Ёшлар ишлари агентлиги томонидан тўлиқ компенсация қилиб бериш бошланган.
Шу кунгача бу имкониятдан фойдаланиш учун 3488 нафар ёшлардан ариза келиб тушган. Шундан 2833 нафарига имтиҳон харажатлари компенсация қилиб берилган. 2 та ариза кўриб чиқиш жараёнида, 169 та янги ариза келиб тушган. 469 та ариза эса рад этилган. Бунинг сабаби ушбу аризачилар мазкур тизим йўлга қўйилишидан аввал сертификатни қўлга киритишган ёки юқори натижа (максимал баллнинг 75 фоиздан юқорисини) қайд этмай мурожаат қилган.
«Истасангиз пластик картага, истасангиз, нақд шаклда пулингизни қайтариб олишингиз мумкин. Албатта, аввало, юқори натижа қайд этиш талаб этилади. Бу имкониятдан фойдаланиш учун қаергадир бориб мурожаат қилиш шарт эмас. Тизим рақамлашган, my.gov.uz портали орқали онлайн ариза юбориш мумкин. my.gov.uz порталида маълумотлар доим янгиланиб боради. Шунингдек, сиз ҳам буни доимий равишда ушбу ҳавола орқали кузатиб боришингиз мумкин», — дейилади хабарда.
Эслатиб ўтамиз, 2020 йилнинг 25 декабрида Ўзбекистон ёшлари форумида иштирок этган Президент Шавкат Мирзиёев халқаро таълим дастурлари бўйича энг юқори балларни тўплаган ёшларга имтиҳон топшириш харажатлари тўлиқ қоплаб берилишини маълум қилганди.
Шунга асосан, 2021 йил апрелида Вазирлар Маҳкамасининг қарори билан Халқаро имтиҳон тизимлари бўйича юқори балл (даража) олган ёшларга имтиҳон топшириш харажатларини тўлиқ қоплаб беришнинг маъмурий регламенти тасдиқланган. Унга кўра, 5 та халқаро имтиҳон тизими (IELTS, TOEFL, GMAT, GRE, SAT) бўйича компенсациялар 2021 йил 1 майдан бошлаб тўланади, яна 13 та имтиҳон тизими бўйича харажатлар 2022 йил 1 январдан қопланишни бошлайди. Харажатларни қоплаш учун фақат имтиҳон топшириш пайтида 31 ёшга тўлмаган Ўзбекистон фуқаролари ва Ўзбекистонда доимий яшовчи фуқаролиги бўлмаган шахслар Давлат хизматлари марказлари ёки Ягона портал орқали мурожаат қилишлари мумкин бўлади.
Изоҳ (0)