Samarqand viloyatida 0,25 gektar yerni 24 ming dollarga sotmoqchi bo‘lgan Davlat kadastrlar palatasi Jomboy tuman filiali xodimi qo‘lga olindi. Bu haqida “Daryo”ga viloyat IIB axborot xizmati ma’lum qildi.
Ma’lum qilinishicha, Samarqand viloyat IIB boshlig‘i nomiga Samarqand tumani “Qaynama” mahallasida yashovchi fuqaro ariza bilan murojaat qilib, Jomboy tumani Qoraki qishlog‘ida yashovchi B.N. (1999-yilda tug‘ilgan) tuman hokimligi zaxirasida bo‘lgan 0,25 gektar bo‘sh yer maydonini jami 23 ming dollarga sotayotganini bildirgan. Qonunbuzar ushbu yer maydonini tuman kadastr xizmatida ishlovchi J. ismli shaxs orqali kadastr bo‘limining kompyuter bazasiga unga tegishli ekani to‘g‘risida ma’lumot kiritib berish uchun ariza muallifidan yana 1000 dollar — jami 24 ming dollar miqdorida pul talab qilgan.
Mazkur arizaga asosan 7-yanvar kuni Samarqand viloyati IIB JQB Korrupsiya va iqtisodiy jinoyatlarga qarshi kurashish bo‘limi hamda DXX Samarqand viloyat boshqarmasi xodimlari hamkorligida Jomboy tumanida tezkor tadbir o‘tkazilgan. Tadbir davomida B.N. va Kadastr agentligi Davlat kadastrlar palatasi Jomboy tuman filialida ishlovchi O‘.J. ariza muallifidan 24 ming dollarni olgan vaqtda ashyoviy dalillar bilan qo‘lga olingan.
Mazkur holat yuzasidan Samarqand viloyat IIB huzuridagi Tergov boshqarmasi tomonidan Jinoyat kodeksining 168-moddasi (firibgarlik) 4-qismi bilan jinoyat ishi qo‘zg‘atilgan.
Avvalroq Toshkent viloyatida 13,7 gektar yerni 3,4 mln dollarga sotmoqchi bo‘lgan investitsiyalar va tashqi savdo boshqarmasi xodimi ushlangani, Toshkentda yerni noqonuniy olib bermoqchi bo‘lgan xonanda DXX tomonidan qo‘lga olingani to‘g‘risida xabar berilgandi.
Izoh (0)