O‘zbekiston yo‘llarida so‘nggi kunlarda sodir bo‘lgan yo‘l-transport hodisalari tafsilotlarini taqdim etamiz.
Sirdaryoda Isuzu va Damas to‘qnashuvi oqibatida 7 kishi jabrlandi
2022-yil 5-yanvar kuni soat 13:30 larda Sirdaryo viloyati Mirzaobod tumani hududidan o‘tuvchi 4R-18A avtomobil yo‘lida Gagarin–Guliston yo‘nalishida haydovchi D.K. Isuzu avtobusini boshqarayotib ehtiyotsizligi oqibatida yo‘lning o‘ng chetida to‘xtab turgan Damas rusumli avtomobilning orqa tomoniga to‘qnashgan.
To‘qnashuv oqibatida avtobus haydovchisi D.K. va 5 nafar yo‘lovchilari hamda Damas avtomobili haydovchisi K.K. va yo‘lovchisi Z.Ch. ga birinchi tez tibbiy yordam ko‘rsatilgan.
Mazkur YTH yuzasidan Mirzaobod tumani IIB YHXB xodimlari tomonidan surishtiruv olib borilmoqda.
Qo‘qon shahar sudyasi YTHga uchradi
2022-yilning 3-yanvar kuni soat 09:00 chamasida Farg‘ona shahar Al-Farg‘oniy va Temiryo‘lchilar ko‘chalari kesishgan chorrahada jinoyat ishlari bo‘yicha Qo‘qon shahar sudi sudyasi M.U. ishtirokida yo‘l transport hodisasi sodir bo‘ldi.
M.U. boshqaruvidagi Nexia-2 va yo‘l transport hodisasining yana bir ishtirokchisi X.A. boshqaruvidagi Nexia-3 avtotransport vositalari shikastlangan. Ikki tarafdan ham og‘ir bo‘lmagan tan jarohati olganlar bor.
Ayni paytda holat yuzasidan vakolatli organ xodimlari surishtiruv ishlari olib bormoqda.
Farg‘onada Lacetti piyoda o‘limiga sabab bo‘ldi
2022-yil 7-yanvar kuni fuqaro A.J. boshqaruvida bo‘lgan Lacetti rusumli avtomashinasini “Suvliariq” mahallasi hududida boshqarib ketayotib, velosipedchi E.A.ni urib yuborgan.
Oqibatida E.A tan jarohati olib hodisa joyida vafot etgan.
Mazkur holat yuzasidan Yozyovon tumani IIB huzuridagi tergov bo‘linmasi tomonidan Jinoyat kodeksining 266-moddasi 2-qismi (odam o‘limiga sabab bo‘lgan transportdan foydalanish xavfsizligi qoidalarini buzish) bilan jinoyat ishi qo‘zg‘atilib, tergov harakatlari davom etmoqda.
Xorazmda Cobalt poyezd bilan to‘qnashdi
2022-yil 7-yanvar kuni soat 18:18 da Xiva–Toshkent yo‘nalishida harakatlanayotgan yo‘lovchi poyezd Xonqa–Bog‘ot peregonidagi qo‘riqlanmaydigan turdagi temir yo‘l kesishmasida 2001-yilda tug‘ilgan fuqaro N.X. Cobalt avtomobilini boshqarayotgan paytda, to‘xtash belgisiga amal qilmay harakatlangan.
Shu tufayli yo‘lovchi poyezdi yo‘liga chiqqan va u bilan to‘qnashgan. Avtomobil haydovchisi kasalxonaga yotqizilgan.
Yo‘lovchi poyezd teplovoziga shikast yetkazilgani bois maxsus texnika jalb qilinib, unga texnik xizmat ko‘rsatilgan. Natijada poyezd soat 19:15 da o‘z harakatini yo‘nalish bo‘ylab davom ettirgan va yo‘lovchilarni o‘z manzillariga yetkazib borgan.
Hozirda ushbu holat bo‘yicha huquq-tartibot hamda boshqa tegishli idoralar tomonidan sodir bo‘lgan yo‘l transport hodisasi yuzasidan surishtiruv va tergov ishlari olib borilmoqda.
Mavzuga doir:
Izoh (0)