Ijtimoiy tarmoqlarda Samarqand viloyati hokimi Erkinjon Turdimov insult oqibatlarini bartaraf etish uchun Germaniyaga davolanish uchun ketganligi to‘g‘risida xabar tarqaldi.
Holatga aniqlik kiritish maqsadida “Daryo” muxbiri viloyat hokimining matbuot kotibi – axborot siyosati masalalari bo‘yicha maslahatchisi Manuchehr Mirzayev bilan bog‘landi. Matbuot kotibi viloyat hokimi Erkinjon Turdimov hamma hokimlar qatori davolanishda ekanligini ma’lum qildi.
“Ortiqcha gap-so‘z yo‘q, hammasi joyida. Hokim 15-yanvardan ishga chiqadi”, – dedi Manuchehr Mirzayev.
Hozirda o‘zi Toshkentda davolanayotganligini bildirgan Manuchehr Mirzayev viloyat hokimi Erkinjon Turdimov ayni paytda Germaniyada yoki O‘zbekistonda davolanayotgani to‘g‘risidagi savolni ochiq qoldirdi.
Ayni paytda Samarqand viloyatida kim vaqtincha hokim vazifasini bajarayotganligi ham noaniq.
Eslatib o‘tamiz, 2021-yilning 17-yanvar kuni Turdimov o‘z sog‘lig‘ini tiklash maqsadida qisqa muddatli davolanish ta’tiliga chiqqandi. 2021-yil 9-yanvar kuni hokimning qon bosimi ko‘tarilgan. O‘sha vaqtda bu borada ma’lumot so‘ralganda “Oldin qon bosimi bilan muammo yo‘q edi u kishida. Ayni vaqtda hokim davolanmayapti, balki tibbiy ko‘rikdan o‘tmoqda. Barchasi yaxshi, men u bilan 10 daqiqa oldin gaplashdim”, — degan edi hokimlik matbuot kotibi Manuchehr Mirzayev .
Shuningdek, o‘sha yili mehnat ta’tiliga ko‘rsatilgan muddatidan 5 kun oldin chiqqan Erkinjon Turdimov ta’til tugagandan so‘ng ham ikki kun dam olib keyin, ishga chiqqandi.
Izoh (0)