Italiyada eng ko‘p qidirilgan jinoyatchilardan biri 61 yoshli sitsiliyalik mafiya rahbari Joakkino Gammino Google Maps yordamida topildi. Bu haqda La Repubblica xabar berdi.
Gammino 17-dekabr kuni Ispaniyaning Madriddan 33 kilometr uzoqlikdagi Galapagar shahrida hibsga olingan, biroq ish tafsilotlari endi ma’lum qilindi.
“Meni qanday topdingiz? So‘nggi 10 yil davomida hatto oilamga ham qo‘ng‘iroq qilmagandim”, — degan mafiya boshlig‘i hibsga olingandan keyin.
Tergovchilarning tushuntirishicha, Gamminoni qo‘lga olishda Google Street View servisidagi kadr asosiy rol o‘ynagan — servis yordamida dunyo bo‘ylab turli shaharlar ko‘chalarining panoramali tasvirini ko‘rish mumkin. Panoramalardan birida El huerto de Manu (“Manu bog‘i”) meva do‘konida turgan oshpaz kiyimidagi odam e’tiborni tortgan.
Politsiya uni Gamminoga o‘xshatgan, keyinchalik ushbu taxminlar do‘kon yaqinida joylashgan La cocina de Manu (“Manu oshxonasi”) restoranining Facebook’ida tasdig‘ini topgan. Tarmoqqa joylashtirilgan oshpaz kiyimidagi o‘sha odamning iyagida chandig‘i bor edi. Ushbu belgi bilan tergovchilar Gamminoni aniqlagan.
Ma’lum bo‘lishicha, mafiya rahbari bir necha yil Ispaniyada Manuel nomi bilan yashab kelgan. Shu bilan birga, restoranida uning mafiya bilan aloqasi haqida bir nechta ishoralar bor edi, deb yozadi La Repubblica. Xususan, u yerda “Sitsiliya kechki ovqati” tortilardi. Restoranning o‘zi xuddi uning yaqinidagi oziq-ovqat do‘koni kabi noqonuniy faoliyat uchun niqob bo‘lgan bo‘lishi mumkin, deya gumon qilmoqda tergovchilar.
Gammino hozir Ispaniyada hibsga olingan. Tergov uni fevral oyi oxirigacha Italiyaga yetkazishni rejalashtirmoqda.
Mavzuga doir:
- AQShda eng ko‘p qidirilgan o‘g‘rilardan biri 50 yildan keyin topildi
- Amerikalik millioner Robert Dyorst 21 yil avvalgi qotillik uchun umrbod qamoq jazosiga hukm qilindi
- Kolumbiyada eng ko‘p qidirilgan narkobaron Dayro Usuga ushlandi. Mamlakat prezidenti uning qo‘lga olinishini “Pablo Eskobarning qulashi”ga tenglashtirdi
Izoh (0)