Qozog‘istonga kelgan KXShT (Kollektiv xavfsizlik shartnomasi tashkiloti) tinchlikparvar kuchlari mamlakat hukumatiga inqirozni yengishda yordam bermoqda. Bu haqda Qozog‘iston prezidenti Qosim-Jo‘mart To‘qayev xalqqa murojaatida aytib o‘tdi.
To‘qayev KXShTga a’zo davlatlar rahbarlari, xususan, Armaniston bosh vaziri, Belarus, Tojikiston, Qirg‘iziston prezidentlariga tashkilot orqali shoshilinch yordam ko‘rsatgani uchun minnatdorlik bildirib, ayniqsa, ko‘mak haqidagi so‘rovga “do‘stona va iliq munosabat bildirgan” Rossiya prezidenti Vladimir Putinni alohida tilga oldi.
O‘z nutqida To‘qayev Qozog‘istondagi tartibsizliklarda mamlakat xalqining asosiy manfaatlaridan yiroq bo‘lgan “erkin ommaviy axborot vositalari va xorijiy arboblar”ning “sheriklik va gijgijlovchi roli” borligini ta’kidladi.
“Mubolag‘asiz aytish mumkinki, bu mas’uliyatsiz demagoglarning barchasi Qozog‘istondagi fojiani yuzaga keltirishda sherik bo‘lgan”, — dedi u. Prezident mamlakat hokimiyatiga qarshi harakatlarni nafaqat “jangarilar”, balki soxta ma’lumotlardan mohirona foydalangan va odamlarning kayfiyatini boshqarishga qodir “mafkuraviy qo‘poruvchilik uchun maxsus tayyorlangan mutaxassislar” ham uyushtirganini ta’kidladi.
“Aftidan, ular yagona qo‘mondonlik punkti tomonidan shug‘ullantirilgan va boshqarilgan”, — dedi To‘qayev.
U Olmaotaga 20 mingdan ortiq banditlar hujum qilganini, “terrorchilar”ning harakatlari tufayli harbiylar va tinch aholi orasida yuzlab kishilar jabrlangani yoki halok bo‘lganini aytib o‘tdi.Murojaati davomida prezident mamlakatda hozircha faqat “ma’lum hududlarda” va “ma’lum vaqt oralig‘ida” internetga ulanishni tiklash to‘g‘risida qaror qabul qilganini aytdi. Bundan tashqari, hududlardagi favqulodda holat tartibi kelgusida bosqichma-bosqich bekor qilinadi.
To‘qayev Qozog‘iston tarixidagi “qora kunlar” tez orada o‘tib ketishiga ishonch bildirdi.
Qozog‘istonda 2-yanvar kuni gaz narxi keskin oshishi sababli ommaviy norozilik namoyishlari boshlanib, bir necha kundan so‘ng ular politsiya bilan qurolli to‘qnashuvlarga aylanib ketdi.
Mamlakatdagi keskinlik munosabati bilan To‘qayev KXShT (Kollektiv xavfsizlik shartnomasi tashkiloti)ga murojaat qilib, yordam so‘radi. Tashkilot cheklangan muddatga respublikaga tinchlikparvar kontingent yubordi.
Qozog‘istondagi tartibsizliklardan ko‘rilgan zararning umumiy miqdori, taxminiy hisob-kitoblarga ko‘ra, 91 million dollarni tashkil etmoqda, shundan 89,8 million dollari Olmaotaga to‘g‘ri keladi.
Izoh (0)