Италияда энг кўп қидирилган жиноятчилардан бири 61 ёшли сицилиялик мафия раҳбари Жоаккино Гаммино Google Maps ёрдамида топилди. Бу ҳақда La Repubblica хабар берди.
Гаммино 17 декабрь куни Испаниянинг Мадриддан 33 километр узоқликдаги Галапагар шаҳрида ҳибсга олинган, бироқ иш тафсилотлари энди маълум қилинди.
«Мени қандай топдингиз? Сўнгги 10 йил давомида ҳатто оиламга ҳам қўнғироқ қилмагандим», — деган мафия бошлиғи ҳибсга олингандан кейин.
Терговчиларнинг тушунтиришича, Гамминони қўлга олишда Google Street View сервисидаги кадр асосий роль ўйнаган — сервис ёрдамида дунё бўйлаб турли шаҳарлар кўчаларининг панорамали тасвирини кўриш мумкин. Панорамалардан бирида El huerto de Manu («Ману боғи») мева дўконида турган ошпаз кийимидаги одам эътиборни тортган.
Полиция уни Гамминога ўхшатган, кейинчалик ушбу тахминлар дўкон яқинида жойлашган La cocina de Manu («Ману ошхонаси») ресторанининг Facebook’ида тасдиғини топган. Тармоққа жойлаштирилган ошпаз кийимидаги ўша одамнинг иягида чандиғи бор эди. Ушбу белги билан терговчилар Гамминони аниқлаган.
Маълум бўлишича, мафия раҳбари бир неча йил Испанияда Мануэль номи билан яшаб келган. Шу билан бирга, ресторанида унинг мафия билан алоқаси ҳақида бир нечта ишоралар бор эди, деб ёзади La Repubblica. Хусусан, у ерда «Сицилия кечки овқати» тортиларди. Рестораннинг ўзи худди унинг яқинидаги озиқ-овқат дўкони каби ноқонуний фаолият учун ниқоб бўлган бўлиши мумкин, дея гумон қилмоқда терговчилар.
Гаммино ҳозир Испанияда ҳибсга олинган. Тергов уни февраль ойи охиригача Италияга етказишни режалаштирмоқда.
Мавзуга доир:
- АҚШда энг кўп қидирилган ўғрилардан бири 50 йилдан кейин топилди
- Америкалик миллионер Роберт Дёрст 21 йил аввалги қотиллик учун умрбод қамоқ жазосига ҳукм қилинди
- Колумбияда энг кўп қидирилган наркобарон Дайро Усуга ушланди. Мамлакат президенти унинг қўлга олинишини «Пабло Эскобарнинг қулаши»га тенглаштирди
Изоҳ (0)