Tokioda qor yog‘ishi oqibatida 215 kishi jabrlandi. Bu haqda tez yordam xizmatiga mas’ul bo‘lgan poytaxt yong‘in bo‘limiga tayanib, “RIA Novosti” xabar berdi.
Kyodo agentligining yozishicha, tarkibiga to‘rtta prefektura kiradigan Tokio hududlarida muzlamalar sabab yo‘llarda kamida 1021 ta yo‘l-transport hodisalari sodir bo‘lgan. 7-yanvar tongi holatiga ko‘ra, avtomagistrallardagi 10 dan ortiq uchastkalar muzlama yoki avariyalar sabab yopilgan.
Tokioga kecha yog‘gan qor hali erimagan. Qator tumanlarga 10 santimetrgacha qor yog‘gan. Yaponiya poytaxti uchun bu kam uchraydigan hodisa — oxirgi marta qor 2020-yilning martida yog‘gan, o‘tgan kungi kabi qor esa oxirgi marta 2018-yilning yanvari va 2014-yilning fevralida yog‘gani aytilmoqda.
“TASS” ma’lumotlariga ko‘ra, 6-yanvar kuni Tokiodagi kuchli qor sabab 60 ga yaqin ichki aviareyslar bekor qilingan. Shuningdek, kuchli qor Yaponiya sharqida, jumladan, Sidzuoka va Kanagava prefekturalarida kuzatilgan.
Dekabr oxirlarida Yaponiyada kuchli qor yog‘ishi oqibatida transport harakati to‘xtadi, minglab oilalar elektr ta’minotisiz qolgan edi. O‘shanda Aomori prefekturasida 200 santimetr, Kioto, Nagoya va Xirosimada ham ko‘p miqdorda qor yog‘gan.
Izoh (0)