Vazirlar Mahkamasining 29-dekabr kuni qabul qilingan 788-sonli qaroriga muvofiq, aholiga arxiv xizmatlarini ko‘rsatishda yengillik va qulayliklar yaratiladi. Bu haqda “Rasmiy xabarlar” xabar qildi.
Qarorga ko‘ra, foydalanuvchiga davlat arxivlari o‘quv zallarida ishlash uchun ruxsatnoma berish muddati uch ish kunidan 1 ish kuniga qisqartirilmoqda. Aholiga qulaylik yaratish maqsadida arxiv hujjatlari, kitoblar va qo‘lyozmalarni raqamlashtirish (elektron nusxa olish) uchun yig‘im miqdori kamaytirilmoqda.
Qayd etilishicha, qarorning qabul qilinishi natijasida arxiv xizmatlarini ko‘rsatishining muddatlari qisqartirilishi va yig‘im miqdorlarining kamaytirilishi orqali jismoniy va yuridik shaxslarga yengilik va qulayliklar yaratiladi hamda korrupsiyaviy xavflar oldi olinadi.
Davlat arxivlari o‘quv zallarida arxiv hujjatlaridan foydalanish bo‘yicha davlat xizmati ko‘rsatishning ma’muriy reglamentiga ko‘ra endilikda mazkur davlat xizmati davlat xizmatlari markazlari yoki O‘zbekiston Respublikasi Yagona interaktiv davlat xizmatlari portali orqali davlat arxivlari tomonidan ko‘rsatiladi. Davlat xizmatidan foydalanish uchun ariza beruvchi Davlat xizmatlari markaziga o‘zi yoki ishonchli vakili kelib murojaat etadi yoki davlat xizmatlaridan elektron shaklda foydalanish uchun YAIDXPdan ro‘yxatdan o‘tadi.
Ariza beruvchi tomonidan so‘rovnomani ERI bilan tasdiqlash talab etilmaydi. Faqat YAIDXP orqali murojaat etgan taqdirda so‘rovnomani yagona identifikatsiya tizimi (One ID) orqali tasdiqlash talab etiladi. Davlat xizmati ko‘rsatilgani uchun yig‘im undirilmaydi (arxiv hujjatlaridan nusxa olish va boshqa pullik arxiv xizmatlari bundan mustasno).
Izoh (0)