Номдор футболчиларни йиғаётган «Навбаҳор», COVID сабаб танг аҳволга тушган «Ливерпуль» ва энг қиммат футболчилар рейтингида 48-ўринда турган Мбаппе. Энг сўнгги спорт янгиликлари

Дунё ва ўзбек спортига оид 5 январнинг энг муҳим хабарлари дайжести билан танишинг.

Ўзбекистон

«Пахтакор» ҳимоячиси Анзур Исмоилов эркин агент мақомида «ОКМК» сафига бориб қўшилди. Шунингдек, «кончилар» ҳимоячи Сардор Раҳмонов билан амалдаги шартномани 2023 йилнинг ёзига қадар узайтирди.

«Навбаҳор» «Пахтакор» ҳимоячиси Егор Кримец ва «Соннам» ярим ҳимоячиси Жамшид Искандаровни ўз сафига қўшиб олди. Шунингдек, Хуршид Мухторов наманганликлар сафига қайтган бўлса, ҳужумчи Андрей Сидоров ҳам фаолиятини «лочинлар» сафида давом эттиради.

«Пахтакор» ўтган мавсум «Бунёдкор»да ҳаракат қилган Миржаҳон Мираҳмадов трансферини эълон қилди.

«Динамо» Жасур Ҳасанов, Обид Жўрабоев, Сардор Эминов, Рўзимбой Аҳмедов, Ислом Шарипов, Ғолиб Сарибоев, Олег Марчук, Дмитро Сидоренко, Сирож Мелиев, Темур Ҳакимов ва Темур Усмонов каби футболчилари билан хайрлашди.

Жаҳон

ФИФА томонида йилнинг энг яхши дарвозабонига бериладиган соврин учун Жанлуижи Доннарумма («ПСЖ» / «Ювентус», Италия), Эдуар Менди («Челси», Сенегал) ва Мануэль Нойер («Бавария», Германия) даъвогарлик қилмоқда.

The Best совринларини топшириш маросими 17 январь куни бўлиб ўтади. Аввалроқ йилнинг энг чиройли голи учун тақдим этиладиган Пушкаш совринига даъвогарлар рўйхати эълон қилинганди.

Месси коронавирусдан тузалди

«ПСЖ» ҳужумчиси Лионель Месси коронавирусдан фориғ бўлди. Аргентиналик футболчининг сешанба куни топширган тест натижаси салбий чиққан.

Шундан сўнг Месси оиласи билан Аргентинадан Францияга учиб кетган. 34 ёшли футболчи тез орада машғулотларни давом эттириши кутилмоқда.

Эслатиб ўтамиз, «ПСЖ» 2 январь куни Мессининг коронавирус билан касалланганини маълум қилганди.

CIES айни вақтдаги энг қиммат футболчилар рўйхатини эълон қилди

Халқаро спорт тадқиқотлари маркази CIES Football Observatory Европа топ-5 лигаларининг энг қиммат футболчиларидан иборат рейтингни эълон қилди.

CIES’нинг махсус алгоритми бўйича ҳисоблаб чиқилган рейтингда биринчи ўринни «Реал» ҳужумчиси Винисиус Жуниор эгаллаган. Кусли учликдан Филип Фоден («Манчестер Сити») ва Эрлинг Ҳоланд («Боруссия Д») жой олган.

Қизиғи, кўплаб порталлар талқини бўйича дунёнинг энг қиммат ўйинчи сифатида эътироф этилаётган Килиан Мбаппе ушбу рўйхатда 48-поғонани эгаллаган. Лионель Месси ва Криштиану Роналду эса топ-100 ликдан жой олмаган.

Рейтингнинг топ-10 лиги билан танишинг:

1. Винисиус Жуниор – 166,4 млн евро;
2. Филип Фоден – 152,6;
3. Эрлинг Ҳоланд – 142,5;
4. Мэйсон Гринвуд – 133,9;
5. Флориан Вирц – 133;
6. Жуд Беллинҳем – 130,1;
7. Альфонсо Дэвис – 122,3;
8. Рубен Диаш – 120,5;
9. Педри – 118;
10. Френки де Йонг – 115,2.

Англия Лига Кубоги ярим финали доирасидаги «Арсенал» — «Ливерпуль» баҳси бошқа кунга қолдирилди. Бунга Мерсисайд клубидаги коронавирус билан боғлиқ танг вазият сабаб бўлди.

Учрашув 6 январдан 20 январга кўчирилди.

«Ливерпуль»да коронавирус билан боғлиқ вазият жиддийлашмоқда. Жамоа бош мураббийи Юрген Клопп кетидан мутахассиснинг асосий ёрдамчиси Пеп Лейндерсда ҳам вирус аниқланган. Шунингдек, 5 январь куни асосий жамоа икки футболчисининг тести ижобий хулоса берган. «Ливерпуль» жамоа машғулот базасини ёпган.

Шота Арвеладзе РПЛ клубида иш бошлаши мумкин

«Пахтакор» собиқ устози «Краснодар»да Виктор Гончаренконинг ўрнини эгаллаши мумкин, дея хабар қилмоқда «Спорт-Экспресс».

Грузиялик мутахассиснинг сўнгги жамоаси «Пахтакор» бўлганди. У «шерлар» билан икки марта Ўзбекистон чемпионлиги ва мамлакат кубогини қўлга киритган.