Xorijiy kinokompaniyalar va kinostudiyalarni mamlakatga jalb etish maqsadida Toshkent viloyatining Bo‘stonliq tumanida yer maydoni 50 gektardan kam bo‘lmagan zamonaviy kinoshahar tashkil etish rejalashtirilmoqda. Bu haqda 2022–2026-yillarga mo‘ljallangan taraqqiyot strategiyasini 2022-yilda amalga oshirish bo‘yicha “Yo‘l xaritasi” loyihasida so‘z boradi.
Hujjat loyihasida qayd etilishicha, 2022-yilning sentabriga qadar kinoshaharlarni tashkil qilish va faoliyatini yo‘lga qo‘yish bo‘yicha xorijiy mutaxassislar va tashkilotlarni jalb qilgan holda jahon tajribasini o‘rganish va natijalari bo‘yicha kinoshahar konsepsiyasini ishlab chiqish rejalashtirilgan.
Shuningdek, mamlakatda milliy filmlar namoyishi va targ‘ibotini yuqori saviyada tashkil qilish, filmlarni ommalashtirish, milliy kinoprokat tarmog‘ini yaratish ham ko‘zda tutilmoqda. Bunda:
- respublikaning har bir tuman (shahar) kesimida filmlar namoyishini nazarda tutuvchi “Kinokarvon” faoliyatining reja jadvalini tasdiqlash;
- ta’lim muassasalarida, harbiy qismlarda va ish rejimi vaxta usulida tashkil etilgan yirik korxonalarda milliy kino mahsulotlarining namoyishini tashkil etish;
- respublika bo‘ylab filmlar targ‘ibotini tashkil qilish va ommalashtirish bo‘yicha reklama kampaniyasini tizimli tashkil qilish, jahon tajribasini qo‘llash;
- mamlakatdagi kinoteatrlarni yagona tarmoqqa ulash, filmlarni onlayn yetkazib berish, namoyish etish va hisobotini yuritish tizimini joriy etish ko‘zda tutilgan.
Xususiy animatsiya studiyalarini qo‘llab-quvvatlash, ularga imtiyozlar berish va subsidiyalar ajratish tizimlarini amaliyotga tatbiq etish, animatsiya yo‘nalishida faoliyat yuritayotgan nodavlat tashkilotlar, studiyalar va kompaniyalarga davlat buyurtmasini berish bo‘yicha tizimli ishlar yo‘lga qo‘yiladi.
Eslatib o‘tamiz, 2021-yilning aprelida O‘zbekiston prezidentining “Kino san’ati va sanoatini yangi bosqichga olib chiqish, sohani davlat tomonidan qo‘llab-quvvatlash tizimini yanada takomillashtirish to‘g‘risida”gi farmoni bilan kinoteatrlar tarmog‘ini rivojlantirish tartibi tasdiqlangan edi. Avgust oyida O‘zbekistonda yil oxirigacha umumiy qiymati 9,7 million dollar xususiy investitsiyalarni jalb qilgan holda 8 ta yangi zamonaviy kinoteatr ochilishi ma’lum bo‘lgandi.
Izoh (0)