Қашқадарё вилояти ҳокими Муротжон Азимовнинг оғзаки топшириғига биноан вилоят чегараларидаги йўл-патруль хизмати постларидан чигитни Самарқанд вилоятига олиб ўтиш тақиқлангани тўғрисида хабар берилганди. Қашқадарё вилояти ҳокимлиги мазкур ҳолатга муносабат билдириб, чигитлар ортилган юк машиналари нима сабабдан тўхтатилганини маълум қилди.
2 январь куни Самарқанд вилояти Каттақўрғон шаҳри ҳокими, сенатор Гавҳар Алимова шаҳарда қарийб 100 та иш ўрни яратган Marokand gold oil extraksiya корхонаси муаммога дуч келганини ёзганди. 28 декабрь куни компания раҳбари Сайдин Рўзиев шаҳар ҳокимиятига келиб, товар ва хом ашё биржасидан очиқ савдолар асосида сотиб олинган 100 тонна чигит маҳсулотини Қашқадарёдан Самарқандга олиб кела олмаётганини маълум қилган.
Қашқадарё вилояти ҳокимлиги матбуот хизматининг ёзишича, ҳақиқатан ҳам 2021 йил 28 декабрь куни Чироқчи туманидаги «Умакай» постида Йўл ҳаракати хавфсизлиги ходимлари томонидан чигит маҳсулоти ортилган 3 та юк транспорт воситалари тўхтатилган.
Ички ишлар ходимларига ўзини чигитни олиб кетаётган корхона экспедитори деб таништирган Комил исмли шахс қоғоз шаклидаги 94 тонна чигит маҳсулотини «Оқ сарой кластер» МЧЖдан Marokand gold oil extraksiya МЧЖга жўнатилгани ҳақида қўлда ёзилган (QR-кодга эга бўлмаган) юк хатини тақдим қилган.
Лекин тақдим этилган ҳужжатлар орасида электрон ҳисобварақ-фактура, биржа савдосидан ютиб олганлиги тўғрисида электрон «Тикет», шартнома ва ишончнома бўлмаган.
Таъкидланишича, Вазирлар Маҳкамасининг 2020 йил 14 августдаги 489-сон қарори 2-иловаси 67-бандида «Товарлар транспорт воситасида ташилганда электрон шаклда расмийлаштирилган ҳисобварақ-фактура QR-кодга эга бўлган электрон тарзда ёки қоғоз нусхаси чоп этилган ҳолда ташувчига тақдим этилиши» белгиланган.
Marokand gold oil extraksiya МЧЖ олиб кетаётган чигит маҳсулоти бўйича QR-кодга эга бўлган ҳисобварақ-фактура бўлмагани ва тақдим этилган ҳужжатларда шубҳа туғилгани сабабли 3 та юк транспорт воситаларидаги чигит маҳсулотлари қонуний равишда вақтинча сақловга олинган.
Шундан сўнг, Marokand gold oil extraksiya ходимлари қачонки ички ишлар ходимлари юкни тўхтатиб ўрганишни бошлаганидан 1 суткадан сўнг, яъни 29 декабрь куни соат 17:31 да «Оқ сарой кластер» МЧЖ томонидан расмийлаштирилиб, Marokand gold oil extraksiya’га 98,3 тонна чигит юборилгани, лекин сотиб олувчи томонидан ҳанузгача электрон имзо билан тасдиқланмаган электрон ҳисобварақ-фактурасининг қоғоз нусхасини тақдим этмаган.
«Республикамизда солиқ қонунчилиги такомиллашиб, Вазирлар Маҳкамасининг 489-сон қарори билан Давлат солиқ қўмитасида қўшилган қиймат солиғидан қочишнинг олдини олиш ва тўғри ҳисоблаш учун электрон ҳисобварақ-фактураларнинг ахборот тизими яратилган. Яъни ҳар бир солиқ тўловчи электрон ахборот тизими орқали сотилган товарни харидорга жўнатишдан аввал электрон ҳисобварақ-фактура расмийлаштириши, олувчи ҳам электрон имзо билан қабул қилганлигини тасдиқлаши лозим. Бу ҳисобварақ-фактуралар Давлат солиқ қўмитасидаги электрон ҳисобварақ-фактураларнинг ахборот тизимида шаклланади ва қўшилган қиймат солиғи ҳисоблаш учун асос бўлади.
Электрон ҳисобварақ-фактурасисиз, қўлда ёзилган қоғоз юк хати билан товарларни реализация қилиш шубҳали бўлиб, юк хати фақатгина ортилган товарнинг йўлдаги текширувлари учунгина фойдаланилиб, кейинчалик йўқотилиши орқали солиқдан қочиш эҳтимоли катта», — дейилади муносабатда.
«Тезкор қидирув тадбирлари ошкора ва ноошкора усулларда ўтказилгани сабабли айрим ҳолатлар ошкор этилмайди», — дейилади хабарда.
Эслатиб ўтамиз, 2020 йилнинг ноябрида Қашқадарё, Сурхондарё ва Хоразм вилоятлари ҳокимларининг оғзаки кўрсатмасига биноан постлардаги йўл патруль хизмати томонидан пахта чигитини бир вилоятдан бошқа вилоятга олиб ўтиш тақиқланганди. Монополияга қарши курашиш қўмитасининг аралашувидан сўнг, тақиқлар олиб ташланган эди.
Маълумот учун, 2021–2018 йилнинг февралидан буён Давлат божхона қўмитаси раиси лавозимида ишлаб келаётган Муротжон Азимов президент фармони билан Қашқадарё вилояти ҳокими вазифасини бажарувчи этиб тайинланган.
Изоҳ (0)