Jizzax viloyatida 4-yanvarga o‘tar kechasi ikkita yong‘in sodir bo‘ldi, deb xabar beradi viloyati FVB matbuot xizmati.
Xususan, 3-yanvar kuni tungi soat 23:33 larda Jizzax shahar “Madaniyat” mahallasida joylashgan xonadonlarning birida yong‘in sodir bo‘lganligi to‘g‘risida xabar kelib tushgan. Darhol yong‘in joyiga shahar FVBning 2 ta yong‘in-qutqaruv bo‘linmasi yuborilgan.
Qutqaruvchilar aytilgan manzilga soat 23:38 da yetib borgan va yong‘in soat 00:02 da batamom o‘chirilgan. Yong‘in natijasida xonadonning 30 kvadrat metr maydonda tom-shift qismi yonib zararlangan. Jabrlanganlar yo‘q. Dastlabki surishtiruv natijalariga ko‘ra, elektr simlarining qisqa tutashuvi yong‘inga sabab bo‘lgan. Ko‘rilgan moddiy zarar miqdori aniqlanmoqda.
Shuningdek, 4-yanvar kuni soat 00:30 larda Baxmal tumani “Fayzobod” MFYda joylashgan xonadonlarning biridan yong‘in sodir bo‘layotgani to‘g‘risida 101 qisqa raqami orqali xabar kelib tushgan. Voqea joyiga tuman FVBning qutqaruvchilar bo‘linmasi yuborilgan. Tezkor harakatlar natijasida yong‘in soat 00:45 da batamom o‘chirilgan va 42 kvadrat metr maydondagi moddiy boyliklar yong‘indan saqlab qolingan. Tan jarohati olganlar yo‘q.
Jizzax viloyati Favqulodda vaziyatlar boshqarmasi yuqoridagi kabi ko‘ngilsiz hodisalarning oldini olish maqsadida fuqarolarni yong‘in xavfsizligi qoidalariga qat’iy rioya qilishga chaqiradi. Isitish mavsumida gaz va elektr jihozlarini nazoratsiz qoldirmaslik hamda qo‘lbola isitish pechlaridan foydalanmaslik yong‘in, chaqnash va is gazidan zaharlanish kabi ko‘ngilsizliklarning oldini olishga xizmat qiladi”, — deyiladi xabarda.
Avvalroq Namangandagi xonadonda yuz bergan yong‘inda xonadon egasi va uning farzandi halok bo‘lgani, Samarqandda sham yoqib dars qilayotgan bola uxlab qolishi oqibatida ko‘p qavatli xonadonda yong‘in sodir bo‘lgani, Surxondaryoda yong‘in bo‘layotgan uydan 5 kishi qutqarib olingani to‘g‘risida xabar berilgandi.
Izoh (0)