3 январь куни америкалик бизнесмен Илон Маскнинг бойлиги қарийб 33 миллиард долларга ошди ва умумий ҳисобда унинг бойлиги 304 миллиард долларга етди, деб хабар беради Forbes.
Бундан олдин тадбиркорнинг капитали 2021 йилнинг ноябрида 300 миллиард долларлик маррани забт этганди. SpaceX ва Tesla асосчиси дунёдаги энг бадавлат инсон ҳисобланади. Маскнинг капитали дунёнинг энг бадавлат инсонлари рўйхатида иккинчи ўринда кетаётган Louis Vuitton Moët Hennessy раҳбари Бернар Арноникидан 100 миллиард долларга кўп. Учинчи ўринда Amazon асосчиси Жефф Безос кетмоқда.
Маскнинг бойлигининг ошиши Tesla акцияларининг нархи кўтарилаётгани билан боғлиқ. Компания автомобиллар бозорига етказиб берилган машиналарининг якуний сонини (930 мингдан ортиқ) эълон қилгач, кўтарилган. Бу таҳлилчиларнинг прогнозларидан ошиб кетган, Tesla акцияси 3 ноябрь кунги савдолар ёпилганида 13 фоизга қимматлаган. Шу билан бирга, компаниянинг бозор капитализацияси 1 триллион доллардан ошиб кетган.
Эслатиб ўтамиз, 2021 йилнинг 1 ноябрида Илон Маск бойлиги 300 миллиарддан ошган тарихдаги биринчи инсонга айланганди. Ўшанда Tesla акциялари бир кун ичида 7,5 фоизга қимматлашган, бизнесменнинг бойлиги эса турли баҳолашларга кўра, 308-311 миллиард долларга етган. Декабрь ойида Time журнали Маскни «Йил одами» дея эълон қилган.
Изоҳ (0)