YHXBB Bo‘stonliqning tog‘ yo‘llarida yuzaga kelgan bir necha kilometrlik tirbandlik haqida ma’lumot berdi

Ayni kunlarda Bo‘stonliq tumanining tog‘li hududlaridagi dam olish maskanlariga tashrif buyuruvchilar soni keskin ortib, u yerga olib boradigan yo‘lda bir necha kilometrlik tirbandliklar yuzaga kelgani haqida xabar berilgan edi. YHXBB holat yuzasidan haydovchilarga murojaat bilan chiqdi.

Unda avtomobil yo‘llarida tirbandliklarning oldini olish va harakat xavfsizligini ta’minlash maqsadida 2021-yil 31-dekabridan 2022-yil 10-yanvariga qadar Bo‘stonliq tumanidagi dam olish maskanlariga olib boruvchi yo‘lda xavfsizlikni va yo‘lning o‘tkazuvchanlik imkoniyatini inobatga olgan holda vaqtincha bir tomonlama harakatlanish tashkil etilgani eslatib o‘tilgan.

YHXBB ushbu hududda ishchi guruh tuzilib, harakat xavfsizligini ta’minlash, tirbandliklarning oldini olish bo‘yicha faoliyat olib borayotganini bildirgan va barcha fuqarolardan ushbu vaziyatni to‘g‘ri baholab, holatdan odilona yo‘l bilan chiqishga chaqirgan.

Haydovchilardan esa spirtli ichimlik iste’mol qilib, rul boshqaruviga o‘tirmaslik,  belgilangan tezlik talablariga hamisha amal qilish, YPX xodimlarining ishoralariga rioya qilishni so‘ragan.