O‘zbekistonda 2022-yilda yoshlarni oliy ta’lim bilan qamrov darajasini 38 foizga yetkazish rejalashtirilmoqda. Bu haqda “Yangi O‘zbekistonning 2022–2026-yillarga mo‘ljallangan taraqqiyot strategiyasi to‘g‘risida”gi prezident farmoni loyihasida so‘z boradi.
Hujjat loyihasiga ko‘ra, 2022-yil mayga qadar Oliy ta’lim muassasalari imkoniyatlarini hisobga olgan holda ta’lim shakllari, shu jumladan, masofaviy ta’lim shakli bo‘yicha ham qabul kvotani shakllantirish belgilanmoqda.
Shuningdek, ishlab chiqarishdan ajralmagan holda oliy ma’lumot olish imkoniyati yanada kengaytiriladi, bunda bosqichma-bosqich masofaviy ta’lim shaklida kadrlar tayyorlash yo‘lga qo‘yiladi. Oliy ta’lim tizimida masofaviy ta’lim shaklini joriy etish orqali yoshlarni ishlab chiqarishdan ajralmagan holda oliy ma’lumot olish imkoniyati yaratiladi.
Bundan tashqari, farmon loyihasida qabul parametrini shakllantirish va tasdiqlashni soddalashtirish, ushbu jarayonda oliy ta’lim muassasalari vakolatini kengaytirish ham nazarda tutilgan. Bunda, to‘lov-kontrakt asosida o‘qishga qabul qilish parametrlarini oliy ta’lim muassasalari tomonidan belgilash tartibi joriy etiladi, 2026-yilda qabul ko‘rsatkichi kamida 250 mingga yetkaziladi.
Avvalroq O‘zbekiston OTMlarining umumiy reytingi tuzilgani, O‘zbekistonda xorijiy oliy ta’lim tashkilotlari soni so‘nggi 3 yilda ikki barobar oshgani, mamlakatda moliyaviy mustaqil OTMlarga qo‘shimcha vakolatlar berilishi to‘g‘risida xabar berilgandi.
Izoh (0)